Keçmiş separatçı rejimin sonuncu başçısı Samvel Şahramanyanın avtomobili narkotik vasitələrin qanunsuz dövriyyəsi işi çərçivəsində müsadirə edilib.
Teleqraf.com xəbər verir ki, bu barədə Ermənistan İstintaq Komitəsi məlumat yayıb.
İyunun 21-də Ermənistan Daxili İşlər Nazirliyinin xüsusi təyinatlıları separatçıların İrəvandakı ofisinə basqın edərək, Şahramanyanın “xidməti avtomobil”ini aparıblar.
Müstəntiq bundan sonra jurnalistlərə bildirmişdi ki, əməliyyat cinayət işi çərçivəsində keçirilib. Amma digər təfərrüatlar açıqlanmamışdı, o, bunun məhkəməyə qədərki sirr olduğunu qeyd etmişdi.
“Hraparak” ötən həftə məlumatlı mənbələrə istinadla yazmışdı ki, Şahramanyan yaxın vaxtlarda həbs edilə bilər. Mənbənin iddiasına görə, ötən günlərdə onun “xidməti avtomobil”inin Ermənistan hökuməti tərəfindən müsadirəsi təsadüfi deyil.
