İyunun 26-da Heydər Əliyev Beynəlxalq Aeroportunda Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə İtaliya Respublikasının “Leonardo” şirkətinin istehsalı olan “C-27J Spartan” tipli hərbi nəqliyyat təyyarəsi təqdim olunub.
Tədbirdə İtaliyanın müdafiə naziri Quido Krosetto, İtaliyanın xarici işlər və beynəlxalq əməkdaşlıq nazirinin müavini Edmondo Çirielli, “Leonardo” şirkətinin prezidenti Stefano Pontekorvo iştirak ediblər.
Azərbaycan Respublikasının müdafiə naziri general-polkovnik Zakir Həsənov Silahlı Qüvvələrin Ali Baş Komandanı İlham Əliyevə raport verdi.
“Leonardo” şirkətinin istehsalı olan “C-27J Spartan” tipli hərbi nəqliyyat təyyarəsi ordumuza hansı yenilikləri qatacaq? Təyyarələrin texniki göstəriciləri nələrdir?
Globalinfo.az -a danışan hərbi ekspert Ədalət Verdiyev deyib ki, “C-27J Spartan” tipli təyyarədən hərbi nəqliyyat, paraşütçülərin və yüklərin havadan atılması, eləcə də tibbi tapşırıqların yerinə yetirilməsi əməliyyatlarında istifadə olunacaq:
“Bununla birlikdə “C-27J Spartan” təyyarələrinin alınmasının əsas səbəbi Azərbaycan ordusunun loqistik imkanlarının artırılmasıdır. İtaliya-ABŞ birgə istehsalı olan təyyarələr hərbi nəqliyyat sinfinə aiddir.
Bu təyyarələrdən 2022-ci ildə 87 ədəd sifariş edilib. Bunlardan iki ədədini də məhz Azərbaycan sifariş etmişdi. Yəni alınan təyyarələr əslində həmin sifariş olunan təyyarələrdir.
Bu təyyarənin alınması Azərbaycanın hərbi daşımaları üçün nəzərdə tutulub. Ümumilikdə isə təyyarənin arsenalımıza daxil edilməsi modernləşdirmə proqramının bir hissəsidir”.
Ekspert deyib ki, “C-27J Spartan” təyyarələrini bir ədədinin qiyməti 53,3 milyon dollardır:
“NATO üzvü olan ölkələr, eləcə də Mərakeş, Peru, Türkmənistan və CAD istifadə edir. Təyyarənin uzunluğu 22.7, qanad uzunluğu isə 28.7 mm-dir. Ümumi hündürlüyü isə 9.65 metrdir. Rəsmi Bakı bu təyyarələri alaraq ordunun loqistik imkanlarını artırmağı hədəfləyir. Təyyarə 11.5 ton yükü hərbi texnika ilə birlikdə daşıya bilir”.
