Modi ŞƏT sammitində iştirak etməyəcək

Baş nazir Hindistan Parlamentinin qarşıdan gələn sessiyası ilə əlaqədar xarici həmkarları ilə görüşü buraxacaq
Hindistanın Baş naziri Narendra Modi iyulun 3-dən 4-dək Qazaxıstanda keçiriləcək Şanxay Əməkdaşlıq Təşkilatının (ŞƏT) sammitində iştirak edə bilməyəcək. AYNA xəbər verir ki, bu barədə yerli “The Hindu” qəzeti mənbələrə istinadən məlumat yayıb.
Qeyd olunur ki, Baş nazir Hindistan Parlamentinin qarşıdan gələn sessiyası ilə əlaqədar xarici həmkarları ilə görüşü buraxacaq. O, iyunun 24-dən iyulun 3-dək davam edəcək və aprelin 19-dan iyunun 1-dək ölkədə keçirilən ümumi deputat seçkilərindən sonra ilk belə tədbir olacaq.
Jurnalistlərin məlumatına görə, Hindistan Prezidenti Draupadi Murmu sessiya zamanı parlamentin hər iki palatasında çıxış edəcək. Eyni zamanda, iyulun 2-dən iyulun 4-dək qanunverici orqanda Modinin iştirakı da daxil olmaqla, “Dövlət başçısına minnətdarlıq bildirmək haqqında” xüsusi prosedur keçiriləcək.
Nəşrin mənbələri dəqiqləşdirib ki, bununla bağlı ŞƏT sammitində Hindistan nümayəndə heyətinə ölkənin xarici işlər naziri Subrahmanyam Caişankar başçılıq edəcək.

• Qazaxıstan
• sammit
• Hindistan
• Narendra Modi
• Şanxay Əməkdaşlıq Təşkilatı