Nazir: İsrail tezliklə Livanla bağlı lazımi qərarlar qəbul edəcək

İsrail hakimiyyəti Livanda yerləşən Hizbullah şiə təşkilatının silahlı birləşmələrinin növbəti hücumlarını dayandırmaq niyyətindədir və tezliklə bu istiqamətdə lazımi qərarlar qəbul edəcək. Bizimyol.info xəbər verir ki, bu açıqlama ilə yəhudi dövlətinin Xarici İşlər Nazirliyinin rəhbəri İsrael Katz çıxış edib. “İsrail Hizbullah terror təşkilatının öz ərazisinə və vətəndaşlarına hücumlarını davam etdirməsinə icazə verə bilməz, biz tezliklə lazımi qərarlar alacağıq”, - deyə o, "X" sosial platformasındakı səhifəsində yazıb. Eyni zamanda, nazir ölkəsinin Hizbullah və Livan istiqamətində mümkün gələcək addımlarının geniş beynəlxalq dəstək tapacağına ümid etdiyini bildirib: “Azad dünya İran və ekstremist İslamın rəhbərlik etdiyi şər oxuna qarşı müharibəsində İsraili qeyd-şərtsiz dəstəkləməlidir. Bizim müharibə sizin müharibənizdir və Hizbullah lideri Şeyx Həsən Nəsrullahın Kipri təhdid etməsi yalnız başlanğıcdır. Şəri məğlub etmək lazımdır, bunu keçmişdə tarix sübut edib”, - deyə Katz qeyd edib. İyunun 18-də İsrail Xarici İşlər Nazirliyinin rəhbəri genişmiqyaslı müharibə olacağı təqdirdə Hizbullahın məhv ediləcəyi və Livana ciddi ziyan dəyəcəyi ilə bağlı xəbərdarlıq edib. İyunun 19-da Nəsrullah videomüraciət edərək, İsrailin guya Kiprdəki hava bazalarına giriş əldə etməyə çalışdığına dair mövcud məlumatlara istinad edib. O, belə bir addımın ada ölkəsi üçün mənfi nəticələr verəcəyi barədə xəbərdarlıq edib. Nəsrullahın sözlərinə görə, bu halda Kipr “döyüş əməliyyatlarında şərik olacaq”, Aralıq dənizindəki obyektlər isə Hizbullah üçün hərbi hədəfə çevriləcək. Cavabında Katz fikrini bildirib ki, söhbət İranın bütün Avropa üçün arxasında duran təhlükədən gedir və azad dünya adlanan dövlətləri bu təhlükə qarşısında birləşməyə çağırıb. Qadir, Bizimyol.info

• İsrail
• terror
• vətəndaşlar
• Livan
• Hizbullah
• ərazi
• hücumlar