Xəzərnews.az xəbər verir ki, mövzu ilə bağlı Medianws.az-a danışan politoloq Elçin Xalidbəyli bildirib ki, Ermənistanın sülh sazişini imzalamağa hazır olması ilə bağlı dedikləri siyasi manipulyasiyadır.
Onun sözlərinə görə, Ermənistan Qərbdən, xüsusən də ABŞ-dən sülh müqaviləsini imzalamamaqla bağlı təlimat alıb: “Bunu artıq inkar etmək mümkün deyil. Son zamanlar Ermənistana davamlı səfərlər edən ABŞ-nin yüksək rütbəli məmurları Paşinyan hakimiyyətini sülh prosesindən uzaqlaşdırmağa nail olublar. Hazırda rəsmi İrəvan daha çox hərbi eskalasiya istiqamətində addımlar atır. Sülhdən danışıb törədə biləcəyi savaşı ön plana çıxarır”.
Politoloq da belə qənaətdədir ki, Fransanın Ermənistanı silahlandırmağı Cənubi Qafqazda münaqişə ocağının yenidən alovlandırılmasına hesablanıb: “Sülh sazişinin imzalanması Qərbdə bir çox siyasi dairələri o cümlədən Fransanı qətiyyən qane etmir. Müqavilənin imzalanacağı təqdirdə Fransa başqa olmaqla, Cənubi Qafqazda maraqları olan Qərb ölkələrinin regiona təsir mexanizmləri sıradan çıxacaq. Bu səbəbdən Fransa və ABŞ ortaq şəkildə Ermənistanı sülhdən uzaqlaşdıraraq, yeni hərbi qarşıdurmaya sövq etməyə çalışırlar. Bununla da regionda hərbi kontingent yerləşdirmə hüququ qazanmağa çalışırlar. Böyük ehtimalla yaxın vaxtlarda Ermənistan Azərbaycana qarşı hərbi təxribatlar törədəcək. Həmin təxribatlardan sonra Ermənistan ərazisində Fransanın hərbi kontingentinin yerləşdirilməsi meydana gələ bilər”.
E.Xalidbəyli deyib ki, artıq Paris, İrəvan və bəzi Qərb dairələri bu yöndə təbliğata başlayıb: “İlkin addımları atmağa başlayıblar. Ermənistanın silahlandırılması ilə yanaşı, Azərbaycana qarşı müəyyən sərt, qərəzli ittihamlar irəli sürürlər. Eyni zamanda Fransada bəzi “nüfuzlu şəxslər” Makron hakimiyyətinə müraciət edərək, Ermənistanda Fransa hərbi bazasının yaradılmasını tələb edirlər. Məqsəd Azərbaycanı təxribatlara çəkməkdir. Yaxın aylarda Cənubi Qafqazda gərginliyin artma ehtimalı kifayət qədər yüksəkdir”.
.
