Parlamenti buraxmaq qərarından sonra Fransa prezidenti Emmanuel Makronun reytinqi 6 bənd düşüb.
Qaynarinfo "Yevropeyska pravda”ya istinadən xəbər verir ki, bunu BVA Xsight-ın RTL üçün keçirdiyi sorğu sübut edir .
Sorğu göstərib ki, respondentlərin 26%-i Makron haqqında yaxşı fikirdədir ki, bu da may ayı ilə müqayisədə 6 bənd azdır. Respondentlərin 74%-i (+6 bənd) onun haqqında pis fikirdə olduqlarını bildiriblər.
RTL-in məlumatına görə, Makron heç vaxt, hətta 2023-cü ilin aprelində, pensiya islahatına qarşı etirazların qızğın vaxtında və 2018-ci ilin noyabrında "sarı jiletlilər” hərəkatının qızğın vaxtında belə qeyri-populyar olmayıb.
Parlamentin buraxılması ilə bağlı qərara gəlincə, 59% dövlət başçısının məsuliyyətli davranmadığı, 54% isə bunun siyasi vəziyyətə aydınlıq gətirməyəcəyinə və demokratik müzakirələri canlandırmayacağı (53%) fikrindədir.
Fransızların böyük əksəriyyəti Makronun ümumi seçki kampaniyasında iştirakını istəmir (70%).
Xatırladaq ki, bu ayın əvvəlində siyasi qüvvəsi Avropa Parlamenti seçkilərində məğlub olduqdan sonra Makron Milli Assambleyanı buraxıb və növbədənkənar parlament seçkiləri təyin edib.
Nizami Bağırov
