Türkiyə Prezidenti Rəcəb Tayyib Ərdoğan gələn ayın əvvəlində ard-arda bir sıra vacib görüşlər keçirəcək.
“AzPolitika” xəbər verir ki, bu barədə Türkiyə KİV-ləri məlumat yayıb.
Məlumata görə, Türkiyə lideri iyulun 3-4-də Astanada keçiriləcək Şanxay Əməkdaşlıq Təşkilatının sammitində iştirak edəcək. Qeyd olunur ki, Ərdoğan təşkilata üzv ölkələrlə aparılacaq məsləhətləşmələrlə yanaşı, Rusiya Prezidenti Vladimir Putinlə də ikitərəfli görüş keçirəcək. Ərdoğan-Putin görüşündə ikitərəfli və regional məsələlərin müzakirə ediləcəyi gözlənilsə də, İsrailin Qəzzaya hücumları və Ukrayna ilə davam edən müharibə liderlərin gündəminin ən mühüm mövzuları olacaq.
Ərdoğan daha sonra iyulun 5-6-da Azərbaycana səfər edəcək, ölkə başçısı İlham Əliyevlə görüşəcək və Şuşada keçiriləcək Türk Dövlətləri Təşkilatına üzv ölkələrin dövlət başçılarının qeyri-rəsmi Zirvə toplantısında iştirak edəcək. Ardınca 9-11 iyul tarixlərində ABŞ-yə səfər edəcək Ərdoğanın NATO liderlərinin sammitinə qatılacağı və Prezident Co Bayden başda olmaqla NATO liderləri ilə görüşəcəyi gözlənilir.
Türkiyə lideri ABŞ-dən qayıtdıqdan sonra bu dəfə Kipr Sülh Hərəkatının 50-ci ildönümü ilə bağlı Şimali Kipr Türk Cümhurriyətinə səfər edəcək. Qeyd olunur ki, iyulun 20-də keçiriləcək hərbi paradı izləyəcəyi və məclisdə çıxış edəcəyi gözlənilən Ərdoğan, bu tədbirə CHP sədri Özgür Özəli də dəvət edib.
“AzPolitika.info”
