Rusiyada botulizmə yeni yoluxma hallarının aşkarlanması davam edir. Məlumata əsasən, qurbanların sayı 195 nəfərə çatıb. Bütün hallar "Lobio" adlı tuna və lobya salatı yeyən insanlarda aşkar edilib.
Hafta.az-ın yazdığına görə, kütləvi zəhərlənmədən sonra salatı satan şirkətin baş meneceri Anton Lozin və daha iki nəfər saxlanılıb.
Faktla bağlı İstintaq Komitəsi tərəfindən Cinayət Məcəlləsinin 238-ci maddəsi ilə cinayət işi açılıb və təqsirləndirilən iki şirkətdə axtarışlar aparılıb. İstintaq Komitəsinin açıqlamasında bildirilir ki, onlardan birinin əməkdaşları zəhərli məhsulları məhv edərək sübutlardan yaxa qurtarmağa çalışıblar.
Zəhərlənənlərin əksəriyyəti Moskvadadır. Hazırda paytaxt xəstəxanalarına botulizm əlamətləri ilə 161 nəfər müraciət edib. Moskva vilayətində Balaşixa, Odintsovo, Ximki, Mytishi və Reutovda hər birində altı yoluxma halı qeydə alınıb. Nijni Novqorod və Kazanda hər birində 14 hadisə var.
Moskva merinin müavini Anastasiya Rakova paytaxtda ev iaşə xidməti olan “Kuhne na Rayone”dən (Regional mətbəx) salat alıb yeyən 121 nəfərin “botulizm” xəstəliyinin əlamətləri ilə xəstəxanaya yerləşdirildiyini, 55 nəfərin vəziyyətinin ağır olduğunu deyib. Xəstələrdən 30-u reanimasiyadadır.
"Biz qida zəhərlənməsi mənbəyi ola biləcək əsas məhsulları müəyyən etmişik, epidemioloji araşdırma aparılır və keyfiyyətsiz məhsulların paylanması dayandırılıb", - Rakova bildirib.
İyunun 14-də xəstələr Moskva xəstəxanalarına sinir sistemini təsir edən nadir yoluxucu xəstəlik olan "botulizm" simptomları ilə müraciət etməyə başlayıblar.
İlkin araşdırmalar zamanı məlum olub ki, zəhərlənməyə ton balığı, lobya və alma ilə hazırlanan salat səbəb olub. “Kuhne na Rayone” ərzaq çatdırılması xidmətinin fəaliyyəti dayandırılıb.
Botulizm nədir?
Botulizm Clostridium botulinum bakteriyasının istehsal etdiyi toksin nəticəsində baş verən ciddi zəhərlənmə növüdür. Adətən konservləşdirilmiş qidalarda olan bu toksin sinir sistemini zədələyə və ciddi sağlamlıq problemləri yarada bilər. Botulizmin simptomlarına əzələ zəifliyi, görmə pozğunluğu və udma çətinliyi daxildir. Erkən diaqnoz və müalicə çox vacibdir, çünki bu vəziyyət tənəffüs çatışmazlığına və hətta ölümə səbəb ola bilər. Botulizm qidaların düzgün saxlanması və hazırlanması texnikası ilə qarşısı alına bilən bir sağlamlıq problemidir.
