Ali Məhkəmədə torpaq üzərində mülkiyyət, istifadə və ya icarə hüququnu pozmada təqsirləndirilən Uğur Salahovun (şərti) barəsindəki qərardan verilən kassasiya şikayətinə baxılıb.
Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
Xatırlatma: Zərdab Rayon Məhkəməsinin hökmü ilə o, 1 il müddətinə azadlığın məhdudlaşdırılması (elektron qolbaq) cəzasına məhkum edilib. Şəki Apellyasiya Məhkəməsi isə şikayət təmin etməyib.
İttihama görə, Uğur Salahov 2021-ci ilin iyun ayının sonlarında vahid niyyətlə Zərdab rayonu ərazisində zərərçəkmişə məxsus olan 480.2 kv metr əmlak kompleksinin "Dədə-Qorqud" dairəsi adlanan ərazi istiqaməti hissəsində 137 kv.metr sahəni, həmçinin, zərərçəkmiş şəxsə məxsus əmlak kompleksinin torpaq sahəsi hüdudlarının bitdiyi ərazinin sərhəd zonası olan, yəni Zərdab şəhər bələdiyyəsi fonduna məxsus 23 kv.metr torpaq sahəsinin qanunla müəyyən edilmiş mülkiyyət, istifadə və icarə hüququ olmadan özbaşına mişar daşı ilə hasarlayıb. Eləcə də o, həmin yeri betonlamaqla torpaq üzərində özbaşına tikinti işləri apararaq zərərçəkmiş şəxsə və Zərdab şəhər bələdiyyəsinin torpaq üzərində mülkiyyət hüququnu pozub.
Uğur Salahov birinci instansiya məhkəməsinin iclasında ona elan olunmuş ittiham üzrə özünü təqsirli bilməyib. O ifadəsində göstərib ki, atası I Qarabağ müharibəsi şəhididir. Eyni zamanda, II Qarabağ müharibəsi başladıqda özü könüllü olaraq döyüş bölgəsinə yollandığını deyib.
Kamal Məmmədov
