Təşkilat Azərbaycana münasibətdə yenə ermənipərəst mövqedən çıxış etdi
Azərbaycanın yürütdüyü sabit və davamlı inkişaf xətti, dövlət maraqlarını özündə ehtiva edən siyasət kursu xarici anti-Azərbaycan dairələrini, ermənipərəst mərkəzləri açıq şəkildə narahat etməkdədir. Bunun nəticəsidir ki, “hüquq müdafiəsi” amilini özünə pərdə edərək korporativ maraqlara xidmətçilik edən bir sıra qurumlar zaman-zaman qərəzli və əsassız açıqlamaları və ya “hesabatları” ilə gündəmə gəlməyə çalışırlar. Ölkəmiz son 4 ildə bölgədə yeni siyasi-iqtisadi mənzərə yaradıb, o cümlədən, beynəlxalq aləmdə tolerantlıq məkanı kimi tanınır, mühüm beynəlxalq tədbirlərin keçirildiyi ünvana çevrilib, ən əsası isə beynəlxalq hüquqa və demokratik prinsiplərə sədaqət nümayiş etdirir - bu fakt ermənilərin havadarı qismində çıxış edən “Freedom House” kimi özünü “demokratiya keşikçisi” qismində təqdim edən, əslində isə milli dövlətlərə qarşı səlib yürüşü aparanların “ürəyincə deyil”. Bu “hüquqçu təsisat” ölkəmizə münasibətdə hər zaman “ermənipərəst standart”dan çıxış edir. Bu dəfə də ənənəvi qərəzli yanaşmanın şahidiyik...
Təhrif, yalan, böhtan...
Belə ki, faktiki olaraq Dövlət Departamentinin strukturu sayılan “Freedom House” 100 ballıq saxta cədvəlində Azərbaycana 7 bal verib. Bunu STM-in İcra Aparatının rəhbəri Sahib Məmmədov açıqlayıb. O əlavə edib: “Bu, təxminən ölkəsində internetin, bütün sosial şəbəkələrin, alternativ medianın qadağan edildiyi ölkələrə bərabər bir reytinqdir. O ölkələrə ki, cəmi bir rəsmi dövlət tv-si var və bir neçə rəsmi qəzeti. Bu öz yerində. Bu barədə şərh vermirəm. Bu şərəfsiz təşkilat yenə də Azərbaycanın ərazi bütövlüyünə hörmətsizlik edir. “Dağlıq Qarabağ” adlı subyekt göstərir və onu ayrıca qiymətləndirir. Onların qənaəti belədir ki, “Azərbaycan Dağlıq Qarabağı işğal edəndən sonra orada da vəziyyət pisləşib”.
Bəli, həm mövqe, həm yanaşma, həm də qənaət ortadadır. “Freedom House”un bu dəfəki yanaşması da şər-böhtandan uzağa getmir. Hər zaman olduğu kimi, bu dəfə də subyektivliyə, və qərəzə söykənən “hesabat”da əsl həqiqət təhrif olunur, yalan, böhtan önə çıxarılır. Azərbaycanın ərazi bütövlüyünü, suverenliyini bərpa etməsi, beynəlxalq hüququn tələblərinin yerinə yetirilməsi bu təşkilatı niyə bu qədər incidir - əsl sual budur...Bu barədə az sonra...
“Freedom House” öz ampluasında...
Hələlik isə bu bədnam təşkilatın Azərbaycana yaxmağa çalışdığı ləkələrin qərəzliyi və əsassızlığı məsələsinə toxunaq. Azərbaycan bütün azadlıqların təmin edildiyi, vətəndaşların hüquqlarının ən ali şəkildə qorunduğu, vətəndaş cəmiyyətinin, mətbuatın inkişafının diqqətdə saxlanıldığı azsaylı ölkələrdəndir. Azərbaycan dövlət Konstitusiyasında insan hüquq və azadlıqlarının təsbitinə ən çox yer vermiş ali sənədlər arasındadır - bizim Ana Yasamızda “Freedom House”un ciddi cəhdlə qoruduğu başqa dövlətlər kimi əsassız iddialar, təxribatçı məsələlər yer almır. Hüquqi, demokratik, dünyəvi, bir sözlə, modern dövlət quruculuğu yolu ilə irəliləyən müstəqil respublikamızda vətəndaş cəmiyyətinin formalaşması, insanların azad, sərbəst yaşaması, qanunun aliliyinin təmin edilməsi məqsədi ilə ən yüksək tələblərə cavab verən normativ hüquqi baza yaradılıb. Vətəndaş cəmiyyəti institutlarının inkişafına çox böyük təkan verilir - dövlət tərəfindən QHT-lərə, gənclər təşkilatlarına və digər qurumlara hər il maliyyə vəsaitləri ayrılır.
Qondarma “bal vermə əməliyyatı” Azərbaycana qarşı qarayaxma kampaniyalarının iflasının bariz sübutudur - çünki, Azərbaycan bütün dünyada mətbu azadlığın təmin edildiyi, azad şəkildə internetdən istifadənin mümkün olduğu dövlətlərdən biri kimi tanınır. Bu məqamlar isə “qiymətləndirmə”nin real faktlar əsasında deyil, konkret güclərin transmilli maraqlarına xidmət edən detallar əsasında tərtib edilməsini göstərir. Digər tərəfdən, dövlətimizin əldə etdiyi nailiyyətlərə, müstəqil xarici siyasət kursumuza, Qarabağın azadlığı üçün apardığımız mübarizəyə, separatizmin sona çatdırılması kimi müsbət bir presedenti formalaşdırmağımıza “ermənipərəst cavabı”n belə olması təəccüblü qarşılanmamalıdır. Bu kimi təşkilatlar beynəlxalq aləmin Azərbaycanın uğurlarına dəstək verməsindən, yeni iqtisadi-siyasi dönəmdə Azərbaycanın uğurlu təmsilçiliyindən daha da aqressivləşirlər. Beləliklə də, özlərini ifşa edirlər...
Yalan iddialar...
O ki qaldı, Qarabağla bağlı “iddia” və ya yalanlara, “Freedom House”un tutduğu yol “arxadan atılan daşa” bənzəyir. Azərbaycan 4 ilə yaxındır ki, özünün ərazi bütövlüyünü və suverenliyini təmin edib. Bütün dünya, beynəlxalq aləm hüquqi və tarixi ədalətin bərpasını - Qarabağın erməni işğalından azad edilməsini, separatizmdən qurtulmasını dəstəkləyib. Azərbaycan atdığı bütün addımlarda, apardığı bütün siyasi fəaliyyətdə yalnız və yalnız beynəlxalq hüquqa əsaslanıb. Azərbaycanda “Dağlıq Qarabağ” adlı inzibati ərazi vahidi yoxdur - Qarabağ iqtisadi rayonu var. “Freedom House” kimi bütün kartları açılmış “təşkilatların” nəyi necə adlandırması isə heç nəyi dəyişmir.
Yaxşı olardı ki, Azərbaycana münasibətdə ikili standartlara müraciət edən təşkilat öz hesabatlarında Ermənistanla bağlı həqiqətləri əks etdirərdi. Bu ölkənin Konstitusiyasında Azərbaycanın ərazilərinə qanunsuz və əsassız iddialar yer almaqdadır. 30 ilə yaxın bölgədə sabitliyə təhdid olan Ermənistan bu gün də yalançı iddialarından əl çəkmək istəmir və regionda əbədi sülhün formalaşmasına maneçilik törədir. Yaxşı olardı ki, “Freedom House” beynəlxalq hüquq müdafiəçisi qismində bu amilə diqqət yetirərdi.
Amma görünən budur ki, ermənipərəst maraqların əsirinə çevrilmiş “Freedom House” da digər anti-Azərbaycan mərkəzlər, hətta dövlətlər kimi ölkəmizə qarşı şər-böhtandan əl çəkmək niyyətində deyil. Bu təşkilat unudur ki, Azərbaycanı bu kimi yalanlarla və ya qərəzlərlə tutduğu ədalətli yoldan çəkindirmək mümkün deyil. Ortada bir fakt var - bu kimi addımlarla, “ öz imicini erməni maraqlarına qurban verməklə “Freedom House heç bir beynəlxalq standartlara, qayda-qanunlara məhəl qoymayan bir qurum olduğunu bir daha nümayiş etdirir.
P.İSMAYILOV
