Dünya Bankı (DB) Azərbaycanda Ümumi daxili məhsulun (ÜDM) 2024-cü ildə 2,3%, 2025-ci ildə isə 2,4% artacağını proqnozlaşdırır. Bu barədə Dünya Bankının iyun sayında dərc olunan "Dünya İqtisadi Perspektivlər" hesabatında deyilir.
Yanvarda proqnozu ilə müqayisədə 2024 və 2025-ci illərdə Azərbaycanda ÜDM-in real artım tempi 0,1 faiz bənd azalacaq.
2026-cı ildə Dünya Bankı ölkədə iqtisadi artımın 2,4% olacağını gözləyir.
"Cənubi Qafqaz regionunda iqtisadi artımın 2024-cü ildən 2026-cı ilə qədər ildə təxminən 3,5% səviyyəsində sabitləşməsi gözlənilir. Bu proqnoz Azərbaycan, Ermənistan və Gürcüstanın iqtisadi dirçəlişinin cari vəziyyətinin və inkişaf perspektivlərinin təhlilinə əsaslanır. 2023-cü ildə nəzərəçarpacaq dərəcədə zəif olan karbohidrogen ixracında müəyyən canlanma müşahidə ediləcək. Bu bərpa Ermənistan və Gürcüstanda iqtisadi artımın son illərdə olduqca yüksək səviyyədən aşağı düşməsi ilə kompensasiya ediləcək”, - hesabatda deyilir.
Cənubi Qafqaz iqtisadiyyatına təsir edən mühüm amil Rusiya-Ukrayna münaqişəsi nəticəsində yaranan ticarət axınının dəyişməsi olaraq qalır.
Dünya Bankı logistika, investisiya və ticarət əlaqələri baxımından region ölkələri üçün həm imkanlar, həm də problemlər yaradaraq bu prosesin davam edəcəyini gözləyir.
Neftin dünya bazar qiymətinin bərpası və "Azəri-Çıraq-Günəşli” kimi iri yataqlarda hasilatın artması yaxın illərdə ölkənin iqtisadi artımının təkanverici amilləri ola bilər.
N.Təbrizli
www.anews.az
