Birləşmiş Millətlər Təşkilatı (BMT) İsrail ordusu və təhlükəsizlik qüvvələrini münaqişə zonalarında uşaqlara zərər verənlər kimi qara siyahıya salıb.
Bakıvaxtı.az xəbər verir ki, bu, BMT-nin Baş katibi Antonio Quterreşin “Uşaqlar və Silahlı Münaqişə Hesabatı”na daxil olub.
Hesabatda bildirilir ki, münaqişələrdə uşaqlara qarşı zorakılıq 2023-cü ildə dəhşətli həddə çataraq 21 faiz artıb.
Bəyanatda uşaqların ölümünə və yaralanmasına səbəb olan hadisələrin əvvəlki ilə nisbətən 35 faiz artdığı vurğulanıb. Qeyd olunub ki, 2023-cü ildə uşaqlara qarşı 32 min 990 ciddi pozuntu qeydə alınıb.
Sənəddə qeyd olunur ki, 2023-cü ildə 5 min 301 uşaq öldürülüb, 6 min 348 uşaq yaralanıb, 8 min 655 uşaq silahlı birləşmələr sıralarına cəlb edilib, 5 min 205 uşağa humanitar yardım çatmasının qarşısı alınıb.
Habelə 2 min 491 uşağın silahlı qruplarla əlaqəsi səbəbiylə həbs olunduğu, 4 min 356 uşağın isə qaçırıldığı bildirilib.
Günel Abbas
