G7 ölkələrinin liderləri bu həftənin sonunda İtaliyada keçiriləcək sammit zamanı Rusiyaya iqtisadi və siyasi təzyiqləri artıracaq.
Reyting.az “Foreign Policy”ə istinadla bildirir ki, dövlət başçıları Rusiyanın dondurulmuş aktivlərindən Ukraynaya yeni kreditlərin ayrılmasını müzakirə edəcəklər. Onlar Moskvanın Şimali Koreya ilə artan əlaqələrini, eləcə də Çinin Rusiya hərbi maşınına dolayı dəstəyini pisləməyi planlaşdırırlar.
İddia olunur ki, 2025-ci ildə G7 liderlərinin tərkibi ABŞ, Böyük Britaniya və indi də Fransada seçkilərin necə keçəcəyindən asılı olaraq kəskin şəkildə dəyişə və daha da parçalana bilər.
İtaliyanın baş naziri Giorgia Meloni toplantıya Əlcəzair, Argentina, Braziliya, Hindistan, Keniya, Mavritaniya, Səudiyyə Ərəbistanı, Cənubi Afrika və Birləşmiş Ərəb Əmirlikləri də daxil olmaqla, G7-dən kənar ən azı onlarla ölkənin liderini dəvət edib.
ABŞ prezidentinin də qatılacağı sammitdə Bayden administrasiyasının əsas prioriteti Rusiyanın aktivlərindən əldə edilən mənfəətdən yararlanaraq Ukraynaya təxminən 50 milyard dollarlıq yeni kreditin verilməsinə dair razılaşmanı yekunlaşdırmaqdır. Təklif geniş nəzəri dəstək alsa da, bir sıra mürəkkəb hüquqi və maliyyə maneələri ilə üzləşir.
G7 ölkələrinin Rusiyanın Şimali Koreya ilə dərinləşən hərbi əlaqələrini pisləyən bəyanatlar verəcəyi və Çin banklarına Moskvaya Qərb sanksiyalarından yayınmağa kömək etməyi dayandırmaq üçün yeni xəbərdarlıqlar edəcəyi də gözlənilir.
ABŞ indiyədək böyük Çin maliyyə institutlarına qarşı təzyiqlərdən qaçsa da, Vaşinqton ilk xəbərdarlıq zərbəsi kimi daha kiçik Çin banklarını hədəfə ala bilər.
Qeyd edək ki, rusiyalı təbliğatçılar Ukrayna və Qəzzada mülki əhalinin itkiləri ilə bağlı Qərbin ikili standartları haqqında danışmağa başlayıblar. Hətta bir çox analitiklər düşünürlər ki, Qəzza münaqişəsi Kremlə Qərbin ikiüzlülüyü barədə Qlobal Cənuba mesaj göndərmək imkanı yaradıb.
Xatırladaq ki, Birləşmiş Ştatlar və onun G7 tərəfdaşları dondurulmuş Rusiya aktivlərindən əldə olunan gəlirlərdən istifadə edərək Ukraynaya lazımi yardımın göstərilməsi yollarını tapmaqda irəliləyiş əldə edirlər.
“Reuters” agentliyi yazır ki, Avropa İttifaqının immobilizasiya olunmuş aktivlərdən əldə edilən illik mənfəətdən istifadə etmək qərarı potensial olaraq Ukraynaya Rusiyaya müqavimət göstərmək üçün ildə milyardlarla dollar qazandıra bilər.
E. KAMAL
