Dow Jones Market Data-nın məlumatına görə, Microsoft, Nvidia və Apple şirkətlərinin səhmlərinin cəmi bazar dəyəri 2000-ci ildən bəri ilk dəfə olaraq S&P 500 indeksinin dəyərinin 20%-dən çoxunu təşkil edib.
Marja.az xəbər verir ki, Bespoke Investment Group-a görə, bu, cəmi üç səhmin yüzlərlə digər şirkətin səhmlərindən daha dəyərlid olması deməkdir. Belə bir vəziyyət cəmi 3 şirkətin İndeksə daha çox təsir edə bilməsinə səbəb olur.
Bu vəziyyət də investorları narahat etməyə başlayıb.
Fairlead Strategies-in qurucusu Katie Stockton, "Nvidia və digər meqa kapitallaşmaya malik şirkətlərin gücü, bazarın bir çox digər sahələrində zəifliyi gizlədib" deyib. Onun sözlərinə görə, kiçik və orta səviyyəli şirkətlərin indeksləri, həmçinin Dow Jones Industrial Average pisləşmə əlamətləri göstərir.
Eyni zamanda, texnoloji cəhətdən ağır olan Nasdaq-100 indeksində konsentrasiya S&P 500-dən də yüksəkdir. Microsoft, Nvidia və Apple 2023-cü ilin noyabrından bəri ilk dəfə olaraq Nasdaq-100 indeksinin dəyərinin 41%-ni təşkil edir.
Hər iki halda, bu qədər az səhmin (3 şirkətin) indeksin qazancına bu qədər töhfə verməsi yüksəliş trendinə şübhə edənləri gücləndirir. Bir çoxları hesab edir ki, ralli dayanarsa, bunun səbəbi 2023-cü ilin əvvəlindən S&P 500-ün qazanclarının böyük bir hissəsini təmin edən Nvidia kimi şirkətlərin səhmlərinin bahalaşmasının dayanması olacaqdır. Nvidia-nın bazar dəyəri keçən çərşənbə günü 3 trilyon dolları ötdükdən sonra bu narahatlıq yenidən gündəmə gəlib və şirkət Apple-ı keçərək ABŞ-da bazar kapitallaşmasına görə ikinci ən böyük şirkət olub.
Richard Bernstein Advisors-un hesablamalarına görə, bu il S&P 500-də səhmlərin yalnız 30%-i indeksin özündən daha yüksək artım tempi göstərib. Sonuncu dəfə belə aşağı rəqəmlər 1998-1999-cu illərdə, yəni təxminən “dot-com bubble” zamanı olub.
İnvestorlar üçün hazırkı bazar mühitinin "dot-com" dövrünə bənzədiyini iddia etmək çətindir. Ancaq bazar gələcəyə baxır və investorlar Nvidia kimi şirkətlərin nə qədər uzun müddətə yüksək inkişaf tempini qoruya biləcəyi ilə maraqlanır.
"Yarımkeçirici şirkətlər keçmişdə digər sənayelər kimi dövri artımlara səbəb olurlar. Nvidia, Wall Street-in qazanc artımı gözləntilərini qeyri-müəyyən müddətə keçə bilməyəcək. Buna görə də səhmlərin həddindən artıq qiymətləndiyini düşünürəm",- RBA-dan Richard Bernstein deyib.
Bazar ertəsi ticarət zamanı Nvidia səhmləri 2%, Apple - 0,8%, Microsoft səhmləri isə 0,8% bahalaşıb.
Nvidia-nın bazar dəyəri bu ilin əvvəlindən 2,4 dəfə (139%), Microsoft - 13,5%, Apple - cəmi 1,5% artıb.
