Bu adda sosial maarifləndirmə məqsədli tamaşa nümayiş edilib
İyunun 10-da “Selektiv abortlarla mübarizə” kampaniyası çərçivəsində tədbir keçirilib.
Ailə, Qadın və Uşaq Problemləri üzrə Dövlət Komitəsi (AQUPDK) və “Üçüncü bahar” Yaşlılara Dəstək İctimai Birliyinin birgə əməkdaşlığı nəticəsində təşkil olunan tədbirdə dövlət və hökumət rəsmiləri, Milli Məclisin deputatları, QHT üzvləri və ictimaiyyət nümayəndələri iştirak ediblər.
Tədbirdən əvvəl kampaniya çərçivəsində sosial maarifləndirmə məqsədilə quruluş verilən "Güclü zəriflər” adlı teatr tamaşası nümayiş olunub. Tamaşanın mövzusu cinsi ayrı-seçkilik, selektiv abortlarla mübarizə, qız uşaqlarının hüquqlarının pozulması, erkən nikah və qohum evliliklərinə qarşı çağırışı özündə ehtiva edib. Tamaşanın ssenari müəllifi İlqar Fəhmi, rejissoru Nicat Kazımovdur.
Tamaşanın nümayişindən sonra çıxış edən AQUPDK-nın sədri Bahar Muradova bildirib ki, ölkəmizdə erkən nikah və dəyərlərimiz çərçivəsində digər mənfi stereotiplərə qarşı fəal mübarizə aparılır.
Azərbaycanda ailə institutunun, xalqımıza məxsus zəngin dəyərlərin qorunub saxlanılmasından danışan B.Muradova deyib: "Dövlət komitəsi ailə dəyərlərinin qorunub saxlanılması, erkən nikahlara qarşı mübarizə istiqamətində müxtəlif layihələr həyata keçirir. “Selektiv abortlarla mübarizə” kampaniyası çərçivəsində “Güclü zəriflər” adlı sosial maarifləndirmə layihəsi də bunlardan biridir”.
Komitə sədri bildirib ki, bu istiqamətdə layihələrini davam etdirəcək.
“Üçüncü bahar” Yaşlılara Dəstək İctimai Birliyinin İdarə Heyətinin sədri Nərmin Qəniyeva maarifləndirici tədbirlərin əhəmiyyətini qeyd edib. Bildirib ki, bugünkü tədbirin əsas məqsədi cəmiyyətdə mənfi hallarla mübarizəni gücləndirmək və müəyyən stereotipləri aradan qaldırmaqdır.
N.Qəniyeva vurğulayıb ki, cinsindən, yaşından asılı olmayaraq cəmiyyətin bütün üzvlərinin azad, sərbəst və sağlam yaşamaq hüququ var. Azərbaycan Respublikasının Əməkdar artisti, "Güclü zəriflər" tamaşasının rejissoru Nicat Kazımov tamaşanın hazırlıqları ilə bağlı tədbir iştirakçılarına ətraflı məlumat verib. Nicat Kazımov çıxışının davamında layihənin əhəmiyyəti ilə bağlı fikirlərini də bölüşüb: "Güclü zəriflər" tamaşası gender əsaslı selektiv abort problemi ilə mübarizəyə həsr edilib. Gəlin, birlikdə bu mühüm mübarizəyə dəstək olaq, qızlarımızın hüquq və dəyərini qoruyaq.”
Daha sonra "Güclü zəriflər” teatr tamaşasının yaradıcı heyətinə və aktyorlarına Fəxri fərmanlar təqdim olunub.Sonda xatirə şəkili çəkilib.
Yaqut Ağaşahqızı, "İki sahil"
