Fələstinin HƏMAS radikal hərəkatının yüksək səviyyəli nümayəndəsi Sami Əbu Zuhri ABŞ-ı Qəzza zolağında hərbi əməliyyatı dayandırması üçün İsrailə təzyiq göstərməyə çağırıb.
"Operativ Məlumat Mərkəzi-OMM" xəbər verir ki, müvafiq bəyanat ABŞ dövlət katibi Antoni Blinkenin regiona planlaşdırılan səfəri ərəfəsində verilib.
Blinken iyunun 10-da Misir və İsrailə səfər edəcək.
"Biz ABŞ administrasiyasını Qəzza zolağında müharibəni dayandırmaq üçün işğalçılara təzyiq göstərməyə çağırırıq və HƏMAS müharibəyə son qoyacaq istənilən təşəbbüsə müsbət cavab verməyə hazırdır", - deyə HƏMAS sözçüsü bildirib.
Oktyabrın 7-də Fələstin radikal HƏMAS hərəkatının minlərlə silahlı yaraqlısının Qəzza zolağından İsrailə daxil olması, dinc sakinlərə hücum etməsi və 200-dən çox girovu qaçırması ilə Yaxın Şərqdə vəziyyət daha da gərginləşib.
Buna cavab olaraq İsrailin baş naziri Benyamin Netanyahu ölkənin müharibə vəziyyətində olduğunu bəyan edib.