Yerli istehsalın təşviqi və xarici ticarət kəsirinin azaldılması məqsədilə Türkiyədə nəqliyyat vasitələrinin alışında yeni tənzimləmə aparılıb.
"Cebhe.info" xəbər verir ki, "Rəsmi Qəzet"də dərc olunan yeni qərara görə, 7 iyul 2024-cü il tarixindən etibarən qüvvəyə minəcək yeni tənzimləmə ilə Çindən gətirilən bütün nəqliyyat vasitələrinə 40 faiz əlavə vergi tətbiq ediləcək.
Artıq bu vergi bütün benzin, dizel, hibrid və elektriklə işləyən avtomobillərə şamil olunacaq.
Əvvəllər yalnız elektrikli avtomobillərə tətbiq edilən 40 faiz əlavə gömrük vergisi bütün yanacaq növlərində olan nəqliyyat vasitələri üçün tətbiq olunacaq.
Əlavə gömrük vergisi tətbiqi gömrük rüsumlarının statistikasının məlum siyahısının 87-ci fəslində sadalanan bütün motorlu nəqliyyat vasitələri, traktorlar, velosipedlər, motosikletlər və digər quru nəqliyyat vasitələri, həmçinin silindrindən asılı olmayaraq tətbiq olunan hissələri, aksesuarları üçün etibarlı olacaq.
Buraya həmçinin daxili yanma mühərrikləri ilə işləyən avtomobillər, elektrik mühərrikli avtomobillər və elektrik nəqliyyat vasitələrinin akkumulyatorları daxildir.
Vergi artımının səbəbi yerli istehsalı təşviq etmək və xarici ticarət kəsirini azaltmaqdır, lakin avtomobil sənayesi nümayəndələri bu qərarın istehlakçıya da təsir edəcək qiymət artımlarına və Çin markalarının Türkiyədəki payının azalmasına səbəb ola biləcəyi barədə xəbərdarlıq edirlər.
