Türkiyənin Ərzincan Binəli Yıldırım Universiteti ilə Bakı Dövlət Universitetinin Qazax filiali arasında əməkdaşlıq protokolu imzalanıb.
Əməkdaşlıq protokolunun imzalanma mərasimində Ərzincan Binəli Yıldırım Universitetini Türk dili və ədəbiyyatı kafedrasının professoru Əli Kafkasyalı təmsil edib. Hər iki ölkənin dövlət himnlərinin səslənməsindən sonra başlayan mərasim Heydər Əliyev və Qazi Mustafa Kamal Atatürkün həyatından bəhs edən qısa videoçarxın nümayişi ilə davam edib.
Bakı Dövlət Universiteti Qazax Filialının direktoru Arif Rüstəmov açılış nitqində əməkdaşlıq protokolunun təfərrüatlarına toxunub. Bildirib ki, iki universitet arasında imzalanmış bu protokol təhsil və elm sahəsində uzunmüddətli əməkdaşlıq, elmi nailiyyətlərin tədris prosesinə tətbiqi və təcrübə mübadiləsi, qarşılıqlı faydanın təmin edilməsi, yüksək ixtisaslı kadrların hazırlanması, elmi potensialın inkişaf etdirilməsi, elmi-tədqiqat işlərinin aparılması prosesində əldə olunan nailiyyətlərin tətbiqi və təcrübə mübadiləsinin aparılmasını nəzərdə tutur.
Ərzincan Binəli Yıldırım Universitetini təmsil edən professor Əli Kafkasyalı bildirib ki, hər iki ali təhsil müəssisəsi arasında əməkdaşlığın qurulmasından məmnunam. Bu protocol elmi-mədəni əlaqələrin qurulması, elmi araşdırma və təhsil sahəsində əlaqələri inkişaf etdirmək və gücləndirmək məqsədi daşıyır. Hesab edirəm ki, tərəflər arasında imzalanmış müqavilə həm alimlərin, həm də tələbələrin gələcək işbirliyində mühüm rol oynayacaq.
Əməkdaşlıq protokolunun imzalanma mərasimində çıxış edən Qazax rayon icra hakimiyyəti başçısının müavini Gülayə Həsənova və filialın direktoru Arif Rüstəmov Ərzincan Binəli Yıldırım Universitetinin rektoru professor Akın Leventə təşəkkür ediblər.
Azərbaycan Bakı Dövlət Universiteti Qazax filiali ilə Ərzincan Binəli Yıldırım Universiteti arasındakı əməkdaşlıq protokolundan sonra professor Əli Kafkasyalı rektoru Akın Leventə məlumat verib. Rektor Levent əməkdaşlıq protokolunun hər iki universitet üçün faydalı olacağına ümid etdiyini və bu işdə təşəbbüslərinə görə professor Əli Kafkasyalıya təşəkkürlərini bildirib.
XQ
