Xarkov vilayətində ağır döyüşlər gedir - FOTO

Ukraynanın Xarkov vilayəti uğrunda döyüşlər şiddətlənib.

Bizim.Media xəbər verir ki, hazırda vilayətin şimal-şərq sərhədində yerləşən Vovçansk şəhərində ağır döyüşlər gedir.

Vovçanskın patrul polisinin rəisi Oleksiy Xarkovski "Facebook" səhifəsində vəziyyətin son dərəcə ağır olduğunu yazıb.
Onun sözlərinə görə, düşmən Vovçansk şəhərinin küçələrində mövqelər tutur.

Müdafiə Nazirliyinin sözçüsü Dmitri Lazutkin bildirib ki, bəzi rus piyada qrupları şəhərə daxil olub. Baş Qərargahın məlumatına görə, Ukrayna qoşunları onları "qismən" geri çəkə bilib.
Ukrayna Baş Qərargahının gecə saatlarında yaydığı məlumatda deyilir ki, qoşunlar Rusiyanın sərhəddə dörd hücumunu dəf edib, lakin bir sıra kəndlər yaxınlığında döyüşlər gedir.

Baş Qərargah açıqlayıb ki, düşmənin atəşi və hücumu nəticəsində qoşunlar Vovçansk və Lukyantsi bölgələrində yeni mövqelərə geri çəkilib.

Rusiya Müdafiə Nazirliyi isə bölgədə daha iki yaşayış məntəqəsinin ələ keçirildiyini bildirib və cümə günündən bu yana ələ keçirilən yaşayış məntəqələrinin ümumi sayı 12-yə çatdığını qeyd edib.

Ən son Qlibok və Lukyants işğal edilib və hər ikisi Xarkov kənarından təxminən 25 km məsafədə yerləşir.
Ukrayna Prezidenti Volodimir Zelenski bölgədəki vəziyyətə görə bütün xarici səfərlərini təxirə salıb. O, Xarkov vilayətindəki vəziyyəti və silah təchizatını müzakirə etmək üçün yüksək rütbəli hərbçilərlə gündəlik konfrans keçirib.

Bizim.Media