Gəncə Apellyasiya Məhkəməsində əmlakı qəsdən məhv etmə və ya zədələmədə təqsirləndirilən B.Yusifovanın barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Əlizamin Abdullayevin sədrliyi ilə keçirilən prosesdə qərar elan olunub.
Qərara əsasən, protest təmin edilməyib.
İttihama görə, hadisə 2020-ci ildə Tovuz rayonunun Alakol kəndində qeydə alınıb.
Belə ki, B.Yusifova ikinci ərinin qohumunun evini yandıraraq, zərərçəkmişə ümumilikdə 44 459 manat dəyərində ziyan vurub.
Tovuz Rayon Məhkəməsinin hökmü ilə ona 3 il 6 ay müddətinə azadlıqdan məhrumetmə cəzası təyin edilib. B.Yusifovaya Cinayət Məcəlləsinin 79-cu maddəsi tətbiq edilməklə onun 13 aprel 2014-cü ildə anadan olmuş uşağının 14 yaşına çatanadək cəzanın çəkilməsi təxirə salınıb. Qadının barəsində seçilmiş polisin nəzarəti altına vermə qətimkan tədbiri hökm qanuni qüvvəyə minənədək dəyişdirilmədən saxlanılıb.
Kamal Məmmədov