"Aston Villa"nın və İtaliya millisinin yarımmüdafiəçisi Nikolo Zaniolo Almaniyada keçiriləcək Avro-2024-ə getməmək riski ilə üzləşib.
90deqiqe.Az xəbər verir ki, buna səbəb Nikolonun “villanlar”ın Premyer Liqada “Liverpul”a qarşı keçirdiyi son matçda (3:3) zədələnməsidir. Müayinələr futbolçunun sol ayağında mikrosınıq olduğunu göstərib. Yaxın vaxtlarda futbolçu zədəsinin dərəcəsini anlamaq və nə qədər meydanda ola biləcəyini öyrənmək üçün İtaliyada əlavə müayinələrdən keçəcək.
Avropa çempionatında italyanlar çox çətin B qrupuna düşüblər. Hazırkı Avropa çempionlarının rəqibləri İspaniya, Xorvatiya və turnirin “qaranlıq atı” Albaniya millisi olacaq.
