Cinayət törədən direktor müavini pedaqoji fəaliyyətlə məşğul olmayıb.
APA xəbər verir ki, bunu Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov jurnalistlərə açıqlamasında deyib.
O bildirib ki, üç ilə yaxındır ki, direktor və müavinlərinin də işə qəbulu müsahibə mərhələsi ilə aparılır. 55 nömrəli məktəbin direktor müavini Elsevər İslamov ilə bağlı cinayət işinə gəldikdə isə o qeyd edib ki, adı çəkilən şəxs məktəbdə təsərrüfat işləri ilə məşğul olub: “O, pedaqoji fəaliyyətlə məşğul olmayıb. Yaxşı olar ki, istintaqın yekun nəticəsini gözləyək".
Qeyd edək ki, mayın 9-da Bakı şəhərinin Xətai rayonu ərazisində yerləşən məktəblərdən birində mühafizəçi işləyən 1964-cü il təvəllüdlü Natiq Mehdi Məhəmməd iş yoldaşı 1966-cı il təvəllüdlü İslamov Elsevər Eldar oğlu tərəfindən aralarında yaranmış mübahisə zamanı qəsdən öldürülüb.
Xatırladaq ki, Natiq Mehdi (Ulubəy) Məhəmməd oğlu Müsavat partiyasının fəallarından olub.