Qurum tələbələri “Xalq qəzeti”nin fəaliyyəti ilə də tanış etdi
Mətbuat Şurasında təcrübə proqramı keçən Azərbaycan Dillər Universitetinin filologiya fakültəsinin bir qrup tələbəsi dünən “Xalq qəzeti”nin redaksiyasında oldu.
Qəzetin baş redaktoru Əflatun Amaşov tələbələrin ölkənin media qurumlarının fəaliyyəti ilə yaxından tanış olmasının hər iki tərəf üçün önəmli olduğunu, redaksiya–oxucu əlaqəsinə əyanilik gətirdiyini söylədi. O, rəhbərlik etdiyi qəzetin yaranma tarixi, keçdiy yol və hazırkı fəaliyyət istiqamətləri barədə ekskursiyaçılara ətraflı məlumat verdi. Baş redaktor qeyd etdi ki, gündəlik ictimai-siyasi nəşr olan qəzetin aparıcı mövzuları ölkənin rəsmi həyatının davamlı işıqlandırılması, dövlətçiliyin möhkəmləndirilməsi, milli-mənəvi dəyərlərin zənginləşdirilməsi məsələləri ilə sıx bağlıdır.
Görüşdə bildirildi ki, peşəkarlıq məsələlərinə son vaxtlar xüsusi diqqət yetirən redaksiya milli jurnalistika ənənələri və qəzetin 1 əsrdən artıq müddətdə formalaşmış təcrübəsi ilə müasir media çağırışlarını üzvi surətdə əlaqələndirməyə çalışır. Dünən olduğu kimi, bu gün də operativlik və obyektivlik başlıca tələb olaraq qalır. Mövzu və janr əlvanlığı, coğrafi əhatə dairəsinin genişliyi daim nəzərə alınır. Gündəlik təqdimatda informasiya yeniliyi analitik aktuallıq, maarifləndirici və əyləncə materiallarının rəngarəngliyi ilə tamamlanır.
Tələbələr qəzet sayının planlaşdırılması, mövzuların işlənməsi, materialların çapa hazırlanması prosesi ilə də tanış oldular. Onlara nəşrin elektron versiyası, saytı və internet televiziyası – “Xalq TV” barədə də məlumat verildi.
Xatırladaq ki, Azərbaycan Dillər Universitetinin filologiya fakültəsinin tələbələri fevral ayından etibarən Mətbuat Şurasında təcrübə proqramı keçirlər. Onlar qurumun təşkilatçılığı ilə ölkəmizin tanınmış qəzet və saytlarında olublar. Layihə mayın sonunadək davam edəcək.
T.RÜSTƏMLİ
XQ