Qarabağın azadlığı uğrunda Vətən mühaibəsində erməni işğalçıların darmadağın edilib ölkəmizdən qovulmasının ardınca separatçı tör-töküntünün cəmləşdiyi Xankəndi xuntası bir zərbə ilə çökdürüldü. Müstəqil Azərbaycan dövlətinin suverenliyi onun bütün ərazisində təmin edildi.
Bu hərbi-siyasi qələbələrinin rəsmiləşdirilməsinin yekunu olacaq iki ölkə arasında sərhədlərin müəyyənləşdirilməsi və sülh müqaviləsinin razılaşdırılması anklavlar məsələsini gündəmə gətirib. Məğlub ölkənin yaranmış reallığı qəbul etmək məcburiyyətində qalmış rəhbərliyinin Ermənistan ərazisindəki Azərbaycan eksklavlarından Qazağın 4 kəndini geri qaytarması sülh prosesinin irəliləməsində əməli addım oldu. Lakin davakar erməni kilsəsi, Qarabğ separatçılarının bədnam qalıqları və Ermənistanın müxtəlif təmayüllü müxalifəti bütün vasitələrlə, xüsusən xarici pozucu dairələrin dəstəyi ilə Azərbaycan kəndlərinin geri qaytarılmasına etiraz edir, bu torpaqların sahibi olduqlarını sübut etmək istəyirlər.
Ermənistan ərazisində qalmış həmin kəndlərin xalqımıza məxsusluğu tarixdən az-çox xəbəri olanlarda heç bir şübhə yaratmır. Belə bir məqamda, üstəlik, tarixi həqiqətin mötəbər açıqlaması olaraq AMEA Tarix və Etnologiya İnstitutunun anklav-eksklavlar barədə arayışını oxucularımıza təqdim edirik.
Yuxarı Əskipara
Yuxarı Əskipara kəndi Qazax rayonunun Əskipara ərazi-inzibati vahidinə daxildir və Ermənistanın İcevan Tavuş vilayətində Azərbaycanın eksklavıdır. Yuxarı Əskipara dağətəyi ərazidədir.
Qazax nahiyəsinin 1860-cı ilə aid kameral təsvirində Qazağın türk kəndləri siyahısında Köhnə Əskipara (14 ailə) və Tatar Əskipara (96 ailə) kəndlərinin adı çəkilir. Bu kəndlərin adı sonrakı dövrlərdə dəyişərək Köhnə Əskipara – “Yuxarı Əskipara”, Tatar Əskipara isə “Aşağı Əskipara” adlandırılmışdır.
”Əskipara” sözü Azərbaycan türk dilində “əski” (köhnə, qədim) , “para” isə “parça”, “hissə”, “yer” mənasını verir. Əskipara, “qədim, köhnə yer” anlamına gəlir. Qazax nahiyəsinin 1860-cı ilə aid kameral təsvirində 22 erməni ailəsinin də yaşadığı Əskipara (ermənilər onu Voskepar adlandırmışlar) kəndinin də adı çəkilir.
1920-ci illərdə Azərbaycan SSR-lə Ermənistan SSR arasında mübahisəli məsələlərdən biri də İcevan qəzasının daxilində qalmış, əhalisi 577 nəfər, ərazisi 3104 desyatin olan Qazax qəzasının Sofulu, Bar-xudarlı və Yuxarı Əskipara kəndləri idi. Qazax qəzasına aid olan bu 3 kənd Azərbaycan ərazisindən erməni ərazi zolaqları ilə ayrılır. 1929-ci il 19–20 iyul tarixlərində Cənubi Qafqaz MİK-nin yerli Komissiyası bu 3 kəndin Ermənistan SSR-in İcevan qəzasına verilməsi barədə əsassız qərar qəbul etmişdir. Ancaq Azərbaycan tərəfinin dirənişi nəticəsində bu kəndlər ölkəmizin tərkibində saxlanılmışdır.
Torpaq Komissiyasının 1928-ci ilə aid hesabatından göründüyü kimi, Qazax qəzasının ümumi yaylaqlarından Ermənistan SSR-ə 75 min 904 desyatin yararlı torpaq və 79 min 208 desyatin əkinə yararsız torpaq verilmişdir. Beləliklə, Qazax qəzasının yaylaqlarının 50 faizi Ermənistana verilmişdir.
Azərbaycan SSR Torpaq Komissarlığının 21.04.1938-ci il tarixdə Azərbaycan Mərkəzi İcraiyyə Komitəsinə təqdim etdiyi sənədə əsasən, Yuxarı Əskipara kəndi Ermənistan SSR-in ərazisində Azərbaycan SSR-in eksklavı kimi təsdiqlənmişdir. Sənəddə göstərilir ki, bu kənd Azərbaycan SSR-in Qazax rayonuna tabedir və ölkənin sərhədlərindən 9–10 km məsafədə Ermənistan SSR ərazilərində yerləşir. Azərbaycanla Yuxarı Əskipara kəndini bir-birindən ayıran Ermənistan ərazisi eni 3–5 km olan meşə zolağından ibarətdir. Əhalisi yalnız azərbaycanlılardan ibarət olmuşdur. İqtisadi cəhətdən Qazax rayonu ilə bağlı kənd Ağstafa – Dilican avtomobil yolundan uzaqda yerləşir.
1992-ci ilin iyunun 8-də Yuxarı Əskipara kəndi erməni işğalçıları tərəfindən işğal edilmişdir. Yerli əhali təcavüzə məruz qalaraq doğma evlərini tərk etməli olmuşdur. Ermənistan silahlı qüvvələrinin işğalı nəticəsində bütün tarixi mədəniyyət abidələri dağıdılaraq yandırılmışdır. Təkcə Yuxarı Əskipara kəndində V–VII əsrlərə aid Alban məbədi, XII əsrə aid yeraltı su kəməri, XII əsrdə inşa edilən Qüllə, Türbə, Qatır körpüsü, Kazım körpüsü, Qulucanlı körpüsü, Koroğlu qülləsi və qədim hamam qalıqları, XIV əsrdə salınan yeraltı yol, XVI əsrdə inşa edilən Şəhərgah qalası və s. yerlə-yeksan edilmişdir.
Qazax rayonunun işğal olunan ərazilərində mövcud olan təbii sərvətlər də tarixi mədəniyyət abidələri kimi qəddarlıqla dağıdılır və talan olunur. Sərhəd boyu yerləşən meşə sahələrində qiymətli ağac növləri; palıd, fıstıq, vələs, dəmirağac, ağcaqayın və s. ağaclar erməni işğalçı ordusu və orada yaşayan erməni əhalisi tərəfindən məhv edilir.
Sofulu
Sofulu kəndi Qazax rayonunun Cəfərli ərazi inzibati vahidinə daxildir və Ermənistanın İcevan rayonunda Azərbaycanın eksklavıdır. Kəndin adı onun əsasını qoymuş Zəngəzur və Qazax qəzalarında yaşayan kəngərlilərin sofulu tayfasının adı ilə bağlıdır. Köçəri həyat sürən bu tayfa Azərbaycan ərazisində müxtəlif bölgələrdə Sofulu adında yaşayış məskənlərinin əsasını qoymuşlar. Qazax rayonuna aid olan Sofulu kəndinin əhalisi bu kənddə XIX əsrin əvvəllərindən oturaq həyata keçmişlər.
Barxudarlı
kəndi də Qazax rayonunun Cəfərli ərazi-inzibati vahidinə daxildir, Ermənistanın İcevan rayonunda Azərbaycanın eksklavıdır. Barxudar şəxs adından və “lı” şəkilçisindən əmələ gəlmiş toponim hesab olunur. Barxudar (bərxudar) bəy XVI əsrin ikinci yarisi, XVII əsrin əvvəllərində yaşamış, məşhur top tökmə ustası olmuşdur. Səfəvilər dövlətində ona "topçubaşı" ləqəbi və vəzifəsi verilmişdir. XVII əsrin əvvəllərində Səfəvi–Osmanlı müharibələri dövründə Təbriz, İrəvan, Gəncə və başqa şəhərlərin mühafizəsində istifadə edilən iri qaladağıdan toplar Barxudarın başçılığı ilə hazırlanmışdır. Kəndin adı barxudarlı nəslinə mənsub ailələr tərəfindən salındığına görə belə adlanmışdir.
Ermənistanda hesab edirlər ki, bu kəndlərə azərbaycanlılar ilk dəfə, guya, 1930-cu illərdə köçürülmüşlər. Ancaq Rusiya imperiyası dövrünə aid mənbələrə görə, artıq 1860-cı ildə Sofulu və Barxudarlı kəndləri var idi və Yelizavetpol quberniyasının Qazax distansiyasına daxil idi. Həmin ilin məlumatına əsasən, Sofuluda 22 ailə (104 nəfər), Barxudarlıda isə 13 ailə (59 nəfər) tatar (Azərbaycan türkü) yaşayırdı.
1920-ci illərdə Azərbaycan SSR-lə Ermənistan SSR arasında mübahisəli məsələlərdən biri də İcevan qəzasının daxilində qalmış, əhalisi 577 nəfər, ərazisi 3104 desyatin olan Qazax qəzasının Sofulu, Barxudarlı və Yuxarı Əskipara kəndləri idi. Qazax qəzasına aid olan bu kəndlər Azərbaycan ərazisindən erməni ərazi zolaqları ilə ayrılır.
Azərbaycan SSR Torpaq Komissarlığının 21 aprel 1938-ci ildə respublikanın Mərkəzi İcraiyyə Komitəsinə təqdim etdiyi sənədə əsasən, bitişik olan Sofulu və Barxudarlı kəndləri Ermənistan SSR-in ərazisində Azərbaycan SSR-in eksklavı kimi təsdiqlənmişdir. Sənəddə göstərilmişdir ki, bu kəndlər Azərbaycan SSR-in Qazax rayonuna tabedir və ölkə sərhədlərindən 3–4 km məsafədə Ermənistan SSR ərazilərində yerləşir. Eksklav iqtisadi cəhətdən Qazax rayonu ilə bağlıdır, hər iki kənd Ağstafa – Dilican avtomobil yolunun üstündə yerləşir.
I Qarabağ müharibəsi dövründə, 1990-cı ilin martından 1992-ci illin martına qədər kiçik miqyaslı atışmalar olsa da, işğal hadisəsi baş verməmişdi. Barxudarlı və Sofulu kəndlərinə ermənilərin genişmiqyaslı hücumu 1992-ci ilin aprelin 23-dən başlamış və 4 gün davam etmişdir. Kənd sakinləri Barxudarlıda 11, Sofuluda 9 post quraraq düşmənə qarşı döyüşmüşlər. Qazax rayonundan köməyə gələn olmasın deyə, ermənilər dəmiryolu xəttini partlatmışlar. Sofulu və Barxudarlı aprelin 27-də işğal edilmişdir. Ağır döyüşlərdə 7 nəfər kənd sakini şəhid olmuş, 3 nəfər isə ağır yaralanmışdır. Barxudarlı və Sofulu kəndlərindəki 230 evin hamısı talan edilərək yandırılmışdır.
Əhalisi əsasən əkinçilik və maldarlıqla məşğul olan Sofulu və Barxudarlı əhalisi Qazax rayonu ərazisinin müxtəlif yerlərində məskunlaşmış və məcburi köçkün həyatı yaşayırlar.
(ardı var)
İkram AĞASİYEV,
AMEA Tarix və Etnologiya İnstitutunun şöbə müdiri, professor