“Sabahın alimləri” XIII respublika müsabiqəsinin qalib layihələrinin müəllifləri ilə görüş olub

Bakı, 10 may, AZƏRTAC

“Sabahın alimləri” XIII respublika müsabiqəsinin qalib layihələrinin müəllifləri ilə ABŞ səfəri öncəsi görüş keçirilib.

Bu barədə AZƏRTAC-a Təhsil İnstitutundan məlumat verilib.

İnstitutun direktor müavini və müsabiqə direktoru Fuad Qarayev görüş zamanı məktəblilərə tövsiyələrini verib.

Qeyd edək ki, məktəblilərimiz mayın 11-17-də ABŞ-da keçiriləcək sərgidə ölkəmizi 8 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri) üzrə dəyərləndirilən 5 elmi-tədqiqat layihəsi ilə təmsil edəcəklər.

ISEF-ə seçim turu olan “Sabahın alimləri” respublika müsabiqəsi ölkəmizdə elmi tədqiqat işinə meyli olan və yüksək elmi tədqiqat nəticələri əldə etmiş istedadlı şagirdlərin aşkarlanması üçün 2012-ci ildən etibarən keçirilir.