Bu gün AFFA İntizam Komitəsinin növbəti iclası keçirilib, bu qurumun bayrağı altında keçirilən müxtəlif yarışlarla bağlı qərarlar açıqlanıb.
Arena.az xəbər verir ki, ən sərt cəzalar “Kəpəz” klubunun U-16 komandasına kəsilib.
Belə ki, mayın 8-də keçirilən U-16 Liqasının “Kəpəz” PFK – “Qəbələ” İK oyununda “Kəpəz”in futbolçusu Yəhya Muradov qarşılaşmanın 78-ci dəqiqəsində rəqib oyunçunu təhqir etdiyinə görə qırmızı vərəqə aldığı üçün 3 oyun cəzalanıb. “Kəpəz”in digər futbolçusu Tunar Əfəndiyev qarşılaşmanın 90-cı dəqiqəsində hakimi təhqir etdiyinə görə qırmızı vərəqə aldığı üçün 4 oyun cəzalanıb.
Oyun bitdikdən sonra “Kəpəz”in futbolçusu Cavanşir Əliyev rəqib komandanın futbolçularını vurduğuna görə 6 oyun cəzalanıb. Bu cəza bütün liqalara şamil edilib. “Kəpəz”in daha bir futbolçusu – Rahib Qurbanov da rəqib komandanın futbolçularını vurduğuna görə 6 oyun cəzalanıb. Bu cəza da bütün liqalara şamil edilib. Oyun bitdikdən sonra “Kəpəz”in 2 azarkeşi meydana daxil olaraq rəqib komandanın futbolçularını vurduğuna görə, uşaq və gənclər liqalarında pul cəzası olmasa da, müstəsna hal olaraq Gəncə klubu 500 manat cərimə edilib. “Kəpəz”in U-16 komandasının növbəti 10 ev oyunu azarkeşsiz keçiriləcək.
U-16 Liqasının “Turan Tovuz” FK – “Masallı” PFK qarşılaşması “Masallı” komandası təyin olunan vaxtda meydanda olmadığı üçün baş tutmayıb. Buna görə sözügedən komandaya 0:3 hesablı texniki məğlubiyyət verilib.
AFFA İntizam Komitəsinin qərarından apellyasiya şikayəti bu barədə bildiriş verildikdən sonra 15 (on beş) gün ərzində Apellyasiya Arbitraj Tribunalın İntizam Palatasına verilə bilər.
