“Nusuk” kartı olmayanlar müqəddəs məkanlara buraxılmayacaq

Səudiyyə Ərəbistanının Həcc və Ümrə Nazirliyi bildirib ki, 2024-cü ildə müntəzəm zəvvarlar üçün “Nusuk” smart kartı müqəddəs yerlərə daxil olmaq istəyən hər kəs, istər potensial zəvvar, istərsə də prosesi idarə edən təşkilatçılar üçün məcburidir. Nazirlikdən bildirilib ki, heç bir istisna yoxdur və bu proseduru pozanlar Həcc qaydaları və göstərişlərini pozduqlarına görə cəzalandırılacaqlar.

Hafta.az-ın yazdığına görə, nazirlik “Facebook” və “X” səhifələrində silsilə yazılarda “Nusuk” smart kartının müntəzəm və qeyri-müntəzəm zəvvarları ayırd edə biləcəyini, kartı olmayanların müqəddəs yerlərə daxil ola bilməyəcəyini bildirib.

Səudiyyə Ərəbistanının Həcc və Ümrə Nazirliyi keçən həftə “Nusuk” kartının iki versiyasını təqdim edib: zəvvarlar tərəfindən daşınan kağız versiyası və telefon kamerasından istifadə edərək kağız kartdakı kodun skan olunaraq əldə edilən rəqəmsal versiyası.

Nazirlikdən verilən məlumata görə, kartda zəvvarların dini öhdəliklərini yerinə yetirmələrini asanlaşdıran bir çox xidmətlər var. Bu, onlara rəvan hərəkət etməyə, yola düşmə vaxtları barədə xəbərdarlıq almağa kömək edir və zəvvarlara onlara göstərilən xidmətləri qiymətləndirməyə və şikayətlərini bildirməyə imkan verir.

Səudiyyə Ərəbistanının Həcc və Ümrə Nazirliyi bəzi ölkələrdə sosial media saytları vasitəsilə öz xidmətlərini reklam edən saxta Həcc kampaniyalarının qurbanı olmamaq barədə xəbərdarlıq edib. Nazirlik izah edib ki, Həcc ziyarəti üçün Səudiyyə Ərəbistanına gəlmək yalnız Səudiyyə Ərəbistanının müvafiq qurumları tərəfindən verilmiş Həcc vizası və ya Həcc işləri idarələri vasitəsilə digər ölkələrlə razılaşdırılmaqla mümkündür. Nazirlik onu da bildirib ki, bu vizanı rəsmi Həcc idarələri olmayan ölkələr üçün “Nusuk” platforması vasitəsilə əldə etmək olar.