Xoşqədəm Hidayətqızının "Səni axtarıram" proqramında axtarılan qadın Lalə Azərtaşın aparıcısı olduğu "Təsir dairəsi" verilişində canlı yayıma çıxıb.
Maraqlıdır ki, qadının əri və qayınanası "Səni axtarıram" verilişinə çıxıb və gəlininin itkin düşdüyünü bildirib.
"İtkin" düşmüş qadın isə həmin vaxtı "Təsir dairəsi" verilişində olub və qayınanasının onu evdən qovduğunu deyib.
Veriliş sosial şəbəkələrdə tənqid edilib. İzləyicilər verilişin layihə rəhbərlərini, aparıcıları sözün əsl mənasında top atəşinə tutublar. Bu da efirlərdə yayımlanan sosial verilişlərə bir daha etiraz dalğası yaradıb.
Qeyd edək ki, bir müddət öncə həmin tip verilişlərin yayımı ilə bağlı kütləvi şikayət olunduğu üçün televiziya rəhbərləri və aparıcılar Prezident Administrasiyasına çağırılıb onlara xəbərdarlıqlar edilib. Daha sonra efir yayımlarının vaxtında qısaldılma tədbiri həyata keçirilib. Hətta, sentyabr ayından bu verilişlərin bağlanacağı deyilir.
Mövzu ilə bağlı Referans.az-a media eksperti Azər Həsrət danışıb:
"Hər şeydən əvvəl xüsusi vurğulamaq istəyirəm ki, bu cür verilişlərə baxmadığıma görə onların keyfiyyəti haqqında danışa bilmirəm. Yəni baxmadığım şey haqqında nə deyə bilərəm? Amma, ümumilikdə təbiidir ki, tamaşaçı olaraq sosial mediada bu cür müzakirələr qarşıma çıxır və təəssüf hissi ilə müşahidə edirəm. O müzakirələrə heç vaxt qarışmıram. Ölkədə intellektual tamaşaçılar arasında belə rəy var ki, o verilişlərin əksəriyyətinin intellektual səviyyəsi çox aşağıdır. Qara- qışqırıq, bazar söhbətləri, səviyyəsiz davranışlar efirdən evlərimizə soxulur. Bizim kimi baxmayamlar baxmır, canını qurtarır. Amma elə kəsim var ki, fərqinə varmadan belə verilişlərə davamlı şəkildə baxır. Ekran qarşısında böyüklərlə bərabər uşaqlar da əyləşir. Yetişməkdə olan nəsil pis örnəklərlə böyüdülür. Bu əlbəttə ki, təhlükəli meyldir. İna görə də Audiovizual Şura bu məsələnin üzərinə ciddi şəkildə getməlidir. Biz demirik ki, insanların sosial problemləri efirdən işiqlandırılmasın, yaxud onlara kömək edilməsin. Amma, bunu səviyyəsiz şəkildə etmək doğru deyil. İnsanların hissləri ilə oynamaq, onları yeri gəldi- gəlmədi əl meymununa çevirib efirə çıxarmaq doğru şey deyil".
Ekspert qeyd edib ki, bu məsələlərdə efirə çıxanlardan çox, onları ora çıxaranları qınamalıyıq: "Çıxanları başa düşürük, yetərincə vəziyyəti təhlil edə bilmirlər. Çıxış yolunu efirə çıxmaqda görürlər. Amma, çıxaranlar bu şeyləri bilməlidirlər axı. Media etikası var. Efir ədəbi var. Bu şeylər diqqətə alınmalıdır. Bir müddət öncə belə verilişlərə görə profilaktik söhbət aparılmışdır. Belə anlaşılır ki, söhbət nəticə verməyib. Mən düşünürəm ki, artıq dövlət öz sərt üzünü göstərməlidir. Bu tip verilişlər intellektual çərçivəyə salınmalıdır. Bizim vaxtımızda AZTV də Naiilə İslamzadənin təqdimatında "Ailələr, talelər" verilişi gedirdi. Necə də gözəl, mədəni veriliş idi. Ailəlikcə sevə-sevə baxırdıq, heç kim də o verilişi tənqid etmirdi.
Şəlalə Babayeva
