Ukraynanı bombalayan Rusiya qırıcılarını Qərb şirkətləri təchiz edir – Yeni araşdırma

Ukraynada müharibənin davam etdiyi 2 il ərzində Rusiyanın “Su-30” qırıcı təyyarələrini istehsal edən şirkəti xaricdən 430 milyon dollarlıq avadanlıqlar alıb.

“AzPolitika” xəbər verir ki, bu barədə “The Moscow Times” gömrük statistikasına istinadən məlumat yayıb.

Bildirilir ki, 2021-ci ildə “Yakovlev PJSC” zavodları üçün idxal 581 milyon dollar, 2022-ci ildə 322,3 milyon dollar, 2023-cü ildə 95,1 milyon dollar təşkil edib.

Söhbət hərbi aviasiyada istifadə olunan radar avadanlıqlarının və proqramlaşdırıla bilən nəzarət sistemlərinin alınmasından gedir. Gömrük hesabatlarında konkret adlar göstərilmir.

Raket istehsalçısı “NPO Mashinostroeniya” və naviqasiya sistemlərinin istehsalçısı “NPP Avtomatlaşdırılmış Ölçmə Kompleksləri” də 2021-ci ildən bəri lazım olan avadanlığı xaricdən alıblar. Əsas tədarükçülər Əlcəzair, Banqladeş, Myanma, Vyetnam, Laos və Malayziya olub.

Daha əvvəl bildirilmişdi ki, sanksiyalara baxmayaraq ABŞ, Fransa, Almaniya və digər NATO ölkələrindən olan şirkətlər Rusiyaya “Su-30” qırıcıları üçün hissələri tədarük etməyə davam edir. Onlar “Rostec” korporasiyasının bir hissəsi olan “Yakovlev PJS”nin filialı İrkutsk Aviasiya Zavodunda istehsal olunur.

Müdafiə sahəsində məlumatların toplanması və təhlili ilə məşğul olan C4ADS qeyri-kommersiya təşkilatının məlumatına görə, 2022 və 2023-cü illərdə “Yakovlev” Qərb şirkətlərindən 8 milyon dollarlıq komponentlər alıb.

“AzPolitika.info”