İdmançılarımızın nəticələri pis deyil.
Bunu "Report"a açıqlamasında Azərbaycan Atıcılıq Federasiyasının (AAF) baş katibi Emin Cəfərov Bakıda keçirilən Dünya Kubokunda idmançılarımızın çıxışını dəyərləndirərkən söyləyib.
AAF rəsmisi 25 metr məsafəyə atəş açma və stend atıcılığı üzrə yarışlarda milli üzvlərinə daha çox ümid bəslədiklərini deyib: "Dünya Kuboku bir neçə gündü başlayıb. Hələ bütün növlərdə yarışlar keçirilməyib. Hazırda son təəssüratlarımızı bölüşmək bir qədər çətindir. Pnevmatik tüfəngdən 10 metr məsafəyə atəş açma növündə mübarizə bitib. Düzdür, idmançılarımız finala yüksələ bilməyiblər. Amma ümumilikdə nəticələr pis deyil. 25 metr məsafəyə atəş açma və stend atıcılığı üzrə yarışlar hələ qarşıdadır. Ümid edirik ki, bu növlərdə idmançılarımız daha yüksək nəticələr göstərib, finallara vəsiqə qazana biləcəklər. Son bir neçə beynəlxalq turnirlərdə, dünya kuboklarında, olimpiya təsnifat yarışlarında, Avropa çempionatlarında idmançılarımız dəfələrlə finallara vəsiqə qazanıblar. Gənclərin medallar qazanması ümidvericidir. İnanırıq ki, bu tendensiya davam edəcək. Bu artıq idmançıların hazırlığı ilə bağlı göstəricidir. Halbuki, keçən il belə bir göstərici olmayıb. İdmançılarımız ötən ilə nisbətən yarışlara daha çox hazırdırlar".
E.Cəfərov xüsusilə Ruslan Lunyovdan yaxşı nəticə gözlədiyini söyləyib: "Sözsüz, həmişə Yay Olimpiya Oyunlarına lisenziya qazanmış Ruslan Lunyovdan gözləntilərim böyükdür. Onun şansı digərlərindən daha çoxdur. Onu da nəzərə almaq lazımdır ki, Lunyov üçün əsas yarış Yay Olimpiya Oyunlarıdır. Sözsüz, həm Bakıda keçirilən Dünya Kuboku, həm də Avropa çempionatı vacib yarışlardır. Lunyovun pik formasına məhz olimpiadada qovuşması nəzərdə tutulub. Gələcəkdə əsasən gənclərdən nəsə gözləyirik. Bu il Avropa çempionatında gənc idmançılarımız çox sayda medallar qazanıblar. Federasiya olaraq bundan sonra diqqəti məhz gənclərə yönəltmək istəyirik. İlin ikinci yarısında əsasən həmin idmançılardan uğur gözləyirik".
Qeyd edək ki, Bakı Atıcılıq Mərkəzində keçirilən Dünya Kuboku mayın 11-də başa çatacaq.
