Azərbaycan çempionu “Qarabağ” daha bir futbolçusu – Nəriman Axundzadə ilə də müqaviləsinin müddətini artırıb.
Arena.az xəbər verir ki, bu barədə Ağdam klubunun mətbuat xidməti məlumat yayıb.
20 yaşlı hücumçu ilə yeni anlaşma 4 il müddətinə nəzərdə tutulub. Axundzadə ilə 2028-ci ilin 30 iyununa qədər müqavilə imzalanıb.
Xatırladaq ki, tərəflər arasındakı əvvəlki anlaşmanın müddəti bu mövsümün sonunda bitəcəkdi.
“Qarabağ” ötən gün mərkəz müdafiəçisi Bəhlul Mustafazadə ilə də 3 illik yeni müqavilə imzalandığını açıqlamışdı.
“Qarabağ”ın öz yetirməsi hesab olunan Nəriman Axundzadə 2023-cü ildən Ağdam klubunun əsas komandasında çıxış edir. Sağ cinah vingeri indiyə qədər “Qarabağ”ın əsas komandasında 53 oyuna çıxıb. O, bu oyunlarda 17 qola imza atıb, 1 məhsuldar ötürmə müəllifi olub.
Nəriman Azərbaycanın U-19 və U-21 yığmalarında forma geyinsə də, hələ əsas millimizdə debüt şansı qazanmayıb.