Mədəniyyət

Məşhur yazıçı oxucularını təəccübləndirib

reyting.az

18:26 03.05.2024

Smartbee
Şikayət et

Dünya şöhrətli Amerika yazıçısı, əsərləri dəfələrlə ekranlaşdırılan Stiven Kinqin açıqlaması oxucularını təəccübləndirib. Yazıçı ona ünvanlanan suala cavabında deyib ki, yeganə bir filmdən razıdır, çünki bu ekran əsərinin romanına uyğunlaşması hətta onun kitabından da üstündür.

Reyting.az-ın "Starte Facts"-a istinadla verdiyi məlumata görə, şöhrətin zirvəsində olan, nadir hallarda əsərləri bəyənən və təqdir edən, Hollivudun çevrəsində "Dəhşət Kralı” kimi tanınmış məhşur yazıçı Stiven Kinq etiraf edib ki, onun əsərinin orijinallığı toxunulmaz qalıb. Yəni mətnə peşəkarlıqla tam uyğunlaşma rejissorun öz sənətində çox mahir olduğunu sübut edib.

S. Kinq qeyd edib ki, əslində müəllifi olduğu əsərlər əsasında çəkilən pis film yoxdur və onların hamısı tamaşaçılar tərəfindən maraqla baxılıb.

Yazıçının sözlərinə görə, onun oxunaqlı əsərləri arasında tək birinin ən yaxşı və orijinal ekran təqdimatı olub ki, bu da tanınmış amerikalı rejissor Brayan De Palmanın uğurudur. Kinqinin fikrincə, məhz Palmanın bu işi onu heyrətləndirib.

Kinq deyib ki, Palmanın 1976-cı ildə ekranlaşdırdığı "Kerri" filmi hətta müəllifin öz əsərindən, həmin məhşur romanından qat-qat yaxşı alınıb.

Yazıçı deyib: "Bu filmin, yəni "Kerri"-nin remeyki barədə səs-küyü çox eşitmişəm. Orijinal bu qədər yaxşı olduğu halda niyə onu yenidən düzəldim? Əla alınıb. Məncə, çox yaxşı alınmışdı, çünki mən dəfələrlə demişəm ki, “Kasablanka” və yaxud buna bənzər bir şey nəzərdə tutmuram. Amma kitabdan daha yaxşı, gərginlikli və həqiqətən də əla bir qorxu filmi idi. Yenə həmin fikirdəyəm ki, o film həqiqətən də mənim romanımdan yaxşıdır”.

Məşhur yazıçı əlavə edib ki, filmin üstünlüyünün həm də bir şərti “Kitabdan daha çevik” olmasıdır.

Qeyd edək ki, "Kerri" filmi kiçik bir əyalət şəhərində hər kəs tərəfindən təhqir olunan sadə bir qız haqqındadır. O köhnə paltar geyinir, heç vaxt yaşıdları ilə görüşmür. Dindar olan anası da sinif yoldaşları kimi onu bezdirir. Bu vəziyyətlə qızın xarakteri dəyişir, uzun müddətdən sonra onda kin və qəzəb toplanır, özündə telekinezi qabiliyyətini kəşf edənə qədər. Və o zamana qədər ki, onun qarşısındakı günahkarlar bütün cinayətlərini anlayıb onun kim olduğunu biləcəklər. Beləliklə, bütün şəhər Kerrinin üzləşdiyi dəhşətli alçaqlığın əvəzini ödəməli olur.

Kinqin romanı əsasında və Palmanın rejissorluğu ilə ekran həyatı almış "Kerri" filmi süjet xəttinə görə yetmişinci illərdə ən yaxşı və qorxulu filmlər sırasında yer alıb.

Oqtay QORÇU
Reyting.az

Bütün xəbərləri reklamsız oxumaq üçün qeydiyyatdan keç və ya login ol. Günlük ölkədə baş verən xəbərləri bizdən izlə.

Seçilən