Nolanın qardaşından “Dark Knight 4” açıqlaması

Conatan Nolan gələcəkdə  “Qara Cəngavər 4” (“The Dark Knight 4”) filminə qayıtmaqdan xoşbəxt olacağını bildirib.

Hafta.az-ın “Armchair Expert”ə istinadən yazdığına görə, Kristofer Nolanın qardaşı “The Dark Knight” trilogiyasının bütün filmlərində ssenarist kimi çalışıb.

2012-ci ildə çəkilmiş “The Dark Knight Rises” ("Qara cəngavər yüksəlir") filmi Kristian Beylin canlandırdığı Brüs Ueynin hekayəsinə qəti son qoymuş kimi görünsə də, Conatan Nolan Betmen kainatında yeni macəralar inkişaf etdirməyə hazır olduğunu bildirib.

Əyləncə və kino dünyasından xəbərlər təqdim edən SHOWSHA-ya danışan Conatan Nolan “The Dark Knight” trilogiyası dünyasına qayıtmağın “yuxu kimi” olacağını deyib.

2022-ci ildə “Screen Rant”a danışan Beyl, Nolan rejissorluq etsə, yeni Batman filmi üçün qayıda biləcəyini söyləmişdi. Bununla belə, rejissor superqəhrəman filmlərinə qayıdacağına dair heç bir ipucu verməyib.

47 yaşlı Conatan Nolan müsahibəsində deyib: "Bu, yuxu olmazdımı... Yəni, geri qayıdıb yenidən üzərində işləmək şansım olsaydı, mütləq".

Conatan Nolan keçən ay Daks Şepardsın “Armchair Expert” podkastında danışıb və qardaşı Kristofer Nolanı “Dark Knight 4” filmini idarə etməyə inandırmaq üçün vaxt lazım olduğunu söyləyib.

Usta rejissor artıq “Batman Begins”lə superqəhrəman filmi çəkmişdi və karyerasının stereotipləşməsini istəmədiyi üçün başqa bir komiks adaptasiyası etməkdə tərəddüd edirdi.

"Batman Begins"də qardaşı ilə birlikdə işlədiyini izah edən Conatan Nolan belə davam edib: "Qardaşımın 14 yaşım üçün mənə hədiyyə etdiyi yeganə komiks " Batman: Year One" idi və 10 il sonra onunla çəkiliş meydançasında işləyirdim".

"Kris yeni bir film çəkməkdə qərarsız idi" sözlərini davam etdirən Conatan Nolan qardaşının "Batman Begins"dən sonra “The Prestige" adlı sehrbaz trillerinin rejissorluğuna birbaşa getdiyini bildirib. “O, superqəhrəman film rejissoru olmaq istəmirdi” Nolan deyib.

Conatan Nolan bildirib ki, prodüser Çarlz Rovenlə oturarkən böyük qardaşı Kristoferə "Dostum, qorxaq olma, gəl bunu edək" deyib: "Ssenariyi bitirəndə mən "Budur, əla olacaq, bu filmi çəkməliyik" dedim və nəhayət, o, baş verdi”.