Stiven Kinq yeni qorxu filmini çox bəyənib

Əfsanəvi qorxu yazarı Stiven Kinq yeni fransız qorxu filmini tərifləməkdən əl çəkə bilməyib.

Hafta.az-ın “Screen Rant”a istinadən yazdığına görə, sosial mediadan fəal şəkildə istifadə edən amerikalı yazar X-də 7 milyondan çox izləyicisinə tez-tez film, serial və kitab tövsiyələri verir.

Kinq “Rotten Tomatoes” icmal saytında 100 baldan 96-ya yaxın bal toplamağı bacaran yeni qorxu filmi üçün təriflər səsləndirib.

Sebastien Vaniçekin ilk bədii filmi "İnfested" sürətlə artan ölümcül hörümçək ordusuna qarşı yaşayış binasının sakinlərinin mübarizəsindən bəhs edir.

Fransız filminin aktyor heyətinə Zeo Kristin, Finnegan Oldfield, Jeröm Nayel, Sofia Lesaffre və Lisa Nyarko daxildir.

76 yaşlı qorxu müəllifi X-də izləyicilərinə müraciət edərək film haqqında danışıb. Amerikalı müəllif “Infested” haqqında yüksək rəy paylaşaraq onu "dəhşətli, iyrənc və yaxşı hazırlanmış" adlandırıb.

Filmin mövzusu haqqında danışan Kinq, “Fransada bəziləri küçük boyda olan hörümçəklər bir yaşayış binasını zəbt edir” deyib.

Ustad yazıçı filmin fransız dilində olduğunu da izləyicilərinə xatırladıb.

Kinq, AMC Networks-in qorxu janrı üçün abunə yayım platforması olan Shudder-də debüt edən yeni hörümçək temalı qorxu filmini tərifləyən yeganə şəxs deyil.

“Infested” haqqında rəylər də son dərəcə müsbətdir. Kino tənqidçiləri filmi “dəbli təqdimatı və düşündürücü elementləri ilə tamaşaçıları valeh edən, onları gərginlik və intriqadan ibarət mürəkkəb toruna dəvət edən maraqlı bir varlıq” kimi təsvir edir.

Bir neçə rəydə personajların inkişafının son dərəcə uğurlu olduğu bildirilir. Bu, mahiyyətcə maraqlı olan insan hekayələri yaradır.

Keçən il Venesiya Film Festivalında premyerası olan bu əsər Sezar Mükafatlarında Ən Yaxşı İlk Film də daxil olmaqla iki nominasiyada namizəd olub.