Ukrayna Ali Radasının sədr müavini Azərbaycan dövlətinə və xalqına minnətdarlıq edib

Bakı, 1 may, AZƏRTAC

Milli Məclis sədrinin müavini, parlamentin Gənclər və idman komitəsinin sədri Adil Əliyev mayın 1-də “Sülh və qlobal təhlükəsizlik naminə dialoq” mövzusunda keçirilən VI Ümumdünya Mədəniyyətlərarası Dialoq Forumunda iştirak etmək məqsədilə ölkəmizdə səfərdə olan Ukrayna Ali Radası sədrinin müavini Olena Kondratyukun başçılıq etdiyi nümayəndə heyəti ilə görüşüb.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Adil Əliyev ölkələrimiz arasında dostluq və əməkdaşlıq əlaqələrindən bəhs edib, dövlətlərarası münasibətlərimizin inkişafının Ulu Öndər Heydər Əliyevin adı ilə bağlı olduğunu bildirib.

O, Ermənistanın 30 illik işğalına son qoyulmasından 4 ilə yaxın vaxt keçdiyini deyib, tərəflər arasında sülh gündəliyinin irəliləməsindən bəhs edib. Sərhədlərin müəyyən olunması məqsədilə birgə komissiyanın yaradıldığını bildirən Milli Məclis sədrinin müavini delimitasiya, demarkasiya işlərinə start verilməsini diqqətə çatdırıb, Fransanın artıq tarixə çevrilmiş münaqişəni alovlandırmağa cəhd göstərməsindən danışıb.

Bu il ölkəmizdə COP29 kimi əlamətdar tədbirin keçiriləcəyini diqqətə çatdıran Adil Əliyev məhz belə möhtəşəm tədbirə ev sahibliyinin Azərbaycana həvalə edilməsini ölkəmizin beynəlxalq nüfuzunun göstəricisi kimi qiymətləndirib.

Ukrayna Ali Radasının sədr müavini Olena Kondratyuk Ukraynaya göstərdiyi humanitar yardımlara görə Azərbaycan dövlətinə və xalqına minnətdarlığını ifadə edib, iki ölkə arasında əlaqələrin genişləndirilməsi ilə bağlı fikirlərini bölüşüb, parlamentlərarası əlaqələrin inkişafının əhəmiyyətindən danışıb.

Görüşdə çıxış edən Milli Məclisin Ukrayna ilə parlamentlərarası əlaqələr üzrə işçi qrupunun rəhbəri Kamran Bayramov da parlamentlərarası əməkdaşlığın inkişafı ilə bağlı fikirlərini bölüşüb.