Niko Uilyams: “Hər yerdə axmaq insanlar var, amma bu…”

Bilbao “Atletik”inin vingeri Niko Uilyams İspaniya və dünya futbolundakı irqçi təhqirlərlə bağlı fikirlərini paylaşıb.

Arena.az xəbər verir ki, o, özü də bu günlərdə belə aqibətlə üzləşib.

Belə ki, İspaniya La Liqasının 33-cü turunun Madrid “Atletiko”su ilə səfər oyununda “döşəkçilər”in azarkeşləri ona “meymun” deyə təhqir ediblər.

Uilyamsın bu barədə fikirlərini təqdim edirik:

“Sənin, dərinin rənginə görə təhqir edilməyin düzgün deyil. Mən bilirəm ki, hər yerdə axmaq insanlar var, amma bu, dəyişməlidir. “Atletiko”nun futbolçuları məni dəstəklədilər, məni başa düşdülər. “Meymun” qışqırıqlarını eşitmək qəbuledilməzdir. Mən üç oğlanın bunu etdiyini gördüm və eşitdim”, deyə Uilyams bildirib.

Xatırladaq ki, oyun “Atletiko”nun 3:1 hesablı qələbəsi ilə başa çatıb.

Niko Uilyams “Atletik” futbol akademiyasının yetirməsidir. O, 2021-ci ilin iyulundan əsas komandada çıxış edir.

Cari mövsümdə Uilyams Bilbao klubunun heyətində 33 oyuna çıxıb, 7 qol vurub, 14 məhsuldar ötürmə ilə diqqət mərkəzinə düşüb. Sol cinah vingerinin “Atletik”dəki karyerası bütövlükdə 118 oyun, 19 qol və 21 məhsuldar ötürmədən ibarətdir.

Uilyams bir müddət öncə “Atletik”lə İspaniya Kral Kubokunun 2023/2024 mövsümünün qalibi olub. Bu, onun karyerasındakı hələlik yeganə tituldur.

Nikolas Uilyams 2022-ci ilin sentyabr ayında debüt etdiyi İspaniya yığmasının heyətində 13 oyun keçirib. O, bu oyunlarda 2 qol vurub, 4 məhsuldar ötürmə verib.

“Transfermarkt” internet portalı 21 yaşlı Niko Uilyamsı 50 milyon avro məbləğində qiymətləndirir.