Robert Levandovski Eto’Onun La Liqadakı nailiyyətini təkrarladı

La Liqanın 33-cü turunda “Valensiya” ilə ev oyunu (4:2) “Barselona”nın polyak mərkəz hücumçusu Robert Levandovski üçün əlamətdar olub.

Arena.az məlumat verir ki, bu oyunda Levandovski üç qol vurub və bu qollardan ikisini rəqib qapısına başla göndərib.

Beləliklə, Levandovski “blauqrana”nın kamerunlu sabiq hücumçusu Samuel Eto’Onun müstəsna nailiyyətini təkrarlayıb. Eto’O 2005-ci ildə “Malyorka” ilə oyunda başla iki qol vurmuşdu. Məlumat “Opta” statistik internet-portalı tərəfindən təsdiqlənib.

Polyak futbolçu “Valensiya” ilə oyunu da şərh edib: “Asan olmadı. Birinci hissədə hücum üçün məkanımız yox idi. Əsas odur ki, biz “Barselona”yıq və onlar bizə iki qol vursalar, biz qalxmalıyıq. Onlar bizə qol vursalar, daha çox qol vurmalıyıq.

İkinci hissədə daha sürətli və daha səbrli oynamağımız gərək olduğunu bilirdik. Son ötürməni və açıq məkanı axtarmaq üçün qapıya yaxın olmaq gərək idi. Komandamız üç xal qazandı və biz dörd qol vurduq. Biz yaxşı oynadıq və indi gələn həftə “Jirona” ilə oyun haqda düşünə bilərik”.

Vurğulayaq ki, “Barselona” La Liqada keçirdiyi son 6 oyunda 5-ci qələbəsini qazanıb. Komanda növbəti turda “Jirona” ilə qarşılaşacaq. Bu oyun, turun mərkəzi görüşü kimi əlamətdar olacaq və çox güman ki, La Liqanın gümüş mükafatçısının adına aydınlıq gətirəcək.

33 oyundan 73 xalla “Barselona” La Liqanın yarış cədvəlində 2-ci, “Jirona” isə 71 xalla 3-cü pilləsində qərarlaşıb. “Valensiya” 47 xalla 8-ci pillədə qərarlaşıb. La Liqanın zirvəsində 84 xalla “Real” mövqe tutub.

Robert Levandovski “Barselona”ya 2022-ci ilin iyulunda 45 milyon avro müqabilində “Bayern”dən keçib. Tərəflər arasında müqavilə daha bir il artırılmaq şərti ilə 2026-cı il iyun ayının sonuna qədər qüvvədədir.

Cari mövsümdə polyak hücumçu “Barselona”nın heyətində bütün yarışlarda 44 oyunda 23 qol vurub və 9 məhsuldar ötürmə müəllifi olub. Onun Kataloniya klubundakı karyerası bütövlükdə 90 oyun, 56 qol və 17 məhsuldar ötürmədən ibarətdir.

“Transfermarkt” internet-portalı 35 yaşlı hücumçunun transfer dəyərini 15 milyon avro məbləğində qiymətləndirir.