Xavi “Barselona”nın bu mövsüm üçün hədəfini açıqladı

“Barselona”nın baş məşqçisi Xavi “blauqrana”nın İspaniya La Liqasının 33-cü turunda “Valensiya” ilə oyunda ev qələbəsini (4:2) şərh edib.

Arena.az “Barça Universal” dərgisinə istinadən, ispan mütəxəssisin bu barədə fikirlərini təqdim edir:

“Fərdi səhvlər diqqət çatışmazlığının nəticəsidir. Bu mövsüm bizimlə çox belə olub. Bu gün mövqeli hücumumuz zəif idi. Ölçülərimizdən yararlandığımız üçün qalib gəldik. İstər hücumda, istərsə də müdafiədə müəyyən fiqurlara xüsusi diqqət yetiririk. Bizim böyük oyunçularımız var: İlkay Gündoğan, Rafinya, Pedri, Lamin Yamal və Frenki De Yonq.

Gələn mövsüm hamımız inkişaf etməliyik. Bu, tamamilə aydındır”, deyə Xavi bildirib.

Xavi həmçinin “blauqrana”nın alman qapıçı Mark-Andre ter Ştegenin xətası nəticəsində buraxılmış qol məqamı haqda danışıb:

“Ter Ştegen həmişə başqalarına kömək etmək üzərində cəmlənib, ona görə də səhvindən sonra hamının niyə onu dəstəklədiyini başa düşürəm. Ter Ştegen paltardəyişmə otağında ən çox sevilən futbolçulardan biridir. Hər kəsin bir-biri ilə çox yaxşı münasibəti var. Hər kəsin ona yaxın olduğunu bilir”, deyə ispan mütəxəssis alman qapıçının bu səhvi ilə bağlı dərinə getməyə lüzum görməyib.

Xavi həmçinin “Barselona”nın cari mövsümün qalan hissəsi üçün planlarını açıqlayıb:

“Biz qarşımızda, La Liqada ikinci yeri tutmağı və bununla da İspaniya Super Kubokuna düşməyi hədəfləmişik. Qələbə bizə ilk dördlükdə yer almağa və Çempionlar Liqasına vəsiqə qazanmağa imkan verəcək”, – AS dərgisi Xavidən sitat gətirir.

Vurğulayaq ki, “Barselona” La Liqada keçirdiyi son 6 oyunda 5-ci qələbəsini qazanıb. Komanda növbəti turda “Jirona” ilə qarşılaşacaq. Bu oyun, turun mərkəzi görüşü kimi əlamətdar olacaq və çox güman ki, La Liqanın gümüş mükafatçısının adına aydınlıq gətirəcək.

33 oyundan 73 xalla “Barselona” La Liqanın yarış cədvəlində 2-ci, “Jirona” isə 71 xalla 3-cü pilləsində qərarlaşıb. “Valensiya” 47 xalla 8-ci pillədə qərarlaşıb. La Liqanın zirvəsində 84 xalla “Real” mövqe tutub.