Türkiyədəki aeroportların sayı altmış birə çatdırılacaq

Ankara, 29 aprel, AZƏRTAC

2053-cü ilədək inkişaf konsepsiyasına uyğun olaraq, Türkiyədə mülki hava limanlarının sayı 61-ə çatdırılacaq.

AZƏRTAC xəbər verir ki, bu barədə aprelin 29-da Türkiyənin nəqliyyat və infrastruktur naziri Abdulkadir Uraloğlu məlumat verib.

Nəqliyyat Nazirliyinin rəhbəri mülki aviasiya sektorunu ölkənin nəqliyyat sisteminin inkişafı üçün prioritet adlandırıb.

“Avropa, Asiya və Afrikanın kəsişməsindəki coğrafi mövqe Türkiyənin iqtisadi inkişafı üçün geniş imkanlar açır. Ölkəmizdən cəmi dörd uçuş saatı məsafəsində 1,4 milyard əhalisi olan 67 dövlət var. Bu çox böyük bazardır”, - deyə nazir bildirib.

Uraloğlu qeyd edib ki, hazırda Türkiyədən dünyanın 131 ölkəsinin aviareyslər 346 hava limanına həyata keçirilir, halbuki 2002-ci ildə bu rəqəm 50 ölkənin 60 aeroportu məhdudlaşırdı.

Nazir qeyd edib ki, son iyirmi ildə ölkədə fəaliyyət göstərən hava limanlarının sayı 26-dan 57-yə yüksəlib. Məqsəd bu göstəricini 61-ə çatdırmaqdır.

“2002-ci ilədək mülki aviasiya sahəsində ikitərəfli razılaşmalar dünyanın 81 ölkəsi ilə qüvvədə olub. Bu gün biz onların sayının 174-ə çatdığını deyə bilirik”, - Uraloğlu əlavə edib.

O xatırladıb ki, 2023-cü ilin yekunlarına görə, ölkənin 57 hava limanında ümumi sərnişin axını 214 milyon nəfər təşkil edib.

Eyni zamanda, ölkənin ən böyük aeroportu olan İstanbul Beynəlxalq Hava Limanı Avropada ən işlək və dünyada sərnişin axınına görə yeddinci aeroport kimi tanınır.

Ramin Abdullayev

AZƏRTAC-ın xüsusi müxbiri

Ankara