Azərbaycan şahmatçısı Ülviyyə Fətəliyeva bu gün Yunanıstanın Rodos adasında təşkil edilmiş Avropa çempionatının qalibi ola bilər.
Arena.az xəbər verir ki, qadın şahmatçılar arasında keçirilən Avropa çempionatında ötən gün 9-cu turun oyunları baş tutub.
Hesabat turunda yarışın lideri olan Fətəliyeva Rumıniya şahmatçısı İrina Bulmaqla heç-heçə oynayıb.
Digər şahmatçılarımızdan Günay Məmmədzadə Yuliya Osmakı (Ukrayna), Səbinə İbrahimova Mitra Hecazipuru (Fransa), Ləman Hacıyeva Marta Dakiçi (Serbiya), Ayan Allahverdiyeva isə Mariya-Anna Stefanidi (Yunanıstan) məğlub edib. Təmsilçilərimizdən Xanım Balacayeva, Gövhər Beydullayeva, Nərmin Abdinova 9-cu turu bərabərliklə başa vurub. Gülnar Məmmədova isə rəqibinə məğlub olub.
Bu gün Avropa çempionatında son turun partiyaları oynanılacaq. 9 turdan sonra aktivində 8 xalı olan şahmatçımız Ülviyyə Fətəliyeva turnir cədvəlinə başçılıq edir. Ən yaxın izləyicisini 1 xal qabaqlayan Fətəliyevaya karyerasında ilk dəfə Avropa çempionu olmaq üçün yarım xal qazanmaq kifayət edəcək. Şahmatçılarımızdan Günay Məmmədzadə və Xanım Balacayeva müvafiq olaraq 5-ci və 9-cu yerlərdə qərarlaşıblar. Son turun nəticələrindən asılı olaraq, bu iki şahmatçımız da mükafatçılar sırasında yer ala bilərlər.