“Qəbələ”nin Premyer Liqada qala bilməməsi Sxadadzenin günahıdır”

Ötən gün Misli Premyer Liqasının 32-ci turunda "Kəpəz"ə uduzan "Qəbələ"nin çempionatı sonuncu - 10-cu pillədə başa vuracağı dəqiqləşib. İdman prinsiplərinə əsasən, əyalət təmsilçisi növbəti mövsüm Azərbaycan 1-ci liqasında mübarizə aparmalıdır. Ancaq bununla bağlı son qərarı AFFA İcraiyyə Komitəsi verəcək.

QOL.az bununla əlaqədar Azərbaycan millisinin sabiq üzvü, "Qəbələ"nin keçmiş futbolçusu Ceyhun Sultanovun fikirlərini öyrənib.O, Premyer Liqada komandaların sayının 12-yə yüksəldilməsinin və bununla da "Qəbələ"ni çempionatda saxlamağın ən yaxşı yol olduğunu bildirib: "Əfsuslar olsun ki, belə bir komanda Premyer Liqada sonuncu oldu. "Qəbələ"ni itirsək, pis olacaq. Düşünürəm ki, Premyer Liqada komanda sayı 12-yə yüksəldilməlidir. Bu şərtlə "Qəbələ"ni Premyer Liqada saxlamaq olar. İdman prinsipləri tətbiq olunsa, "Qəbələ" çempionatdan gedəcək. Ona görə də komanda sayının 12-yə çatdırılmasını təklif edirəm".

"Qəbələ"nin baş məşqçisi Kaxaber Sxadadze "Kəpəz"lə görüşdən sonra açıqlamasında kluba gələrkən bu cür nəticə ilə üzləşəcəyini gözləmədiyini deyib və belə durumun yaranmasına görə komandanı günahlandırıb, imicinin korlandığını deyib. C.Sultanov gürcüstanlı mütəxəssisin bu fikirlərinə də münasibət bildirib: "Sxadadzenin belə deməyi düzgün deyil. Komandanın sonuncu olmağında onun özünün də günahı var. Sxadadzeni gətirmişdilər ki, "Qəbələ"ni Premyer Liqada saxlasın. O, bunu bacarmadı. "Qəbələ" Avroliqada da oynayıb. Hazırkı heyətinə görə də "Kəpəz"dən zəif deyil, güclüdür. Sadəcə Sxadadze bunu bacarmadı".

C.Sultanov 4-5 komandanın Premyer Liqada 2-ci yer uğrunda mübarizəsinə də toxunub: "Çempionatımız çox maraqlı keçir. Kimin öndə, kimin aşağıda qərarlaşacağını demək çətindir. 4-5 komandanın hər biri 2-ci yeri tutmağa yaxındır. "Sumqayıt" yaxşı futbol oynayır. "Zirə" və "Sabah"ın oyununda inkişaf var. "Neftçi" də keyfiyyətinə görə yuxarı pillələrdədir. Kim az səhv edəcəksə, o da uğur qazanacaq".

Nur Zeynalova