Xaricdən quş ətini neçəyə alırıq?

Cari ilin yanvar-fevral aylarında ölkəmizə xaricdən 5 min 683 ton miqdarında quş əti və onun əlavə məhsulları gətirilib. 

Valyuta.az Dövlət Statistika Komitəsinə istinadən xəbər verir ki, bu miqdarda məhsulun  dəyəri 9 milyon 305 min ABŞ dolları olub. Bu, ötən ilin eyni dövrü ilə müqayisədə miqdar ifadəsi ilə 104 ton (1,8%) az, dəyər ifadəsi ilə 1 milyon 214 min ABŞ dolları (15,7%) çoxdur. 2023-cü ilin müvafiq dövründə xaricdən quş əti və onun əlavə məhsullarının idxalının miqdarı 5 min 787 ton, dəyəri isə 8 milyon 91 min ABŞ dolları olub.

Hesabat dövründə idxal olunan quş əti və onun məhsullarının bir kiloqram üçün orta qiyməti 1,64 ABŞ dolları (2,78 manat) olub ki, bu da illik müqayisədə 0,24 ABŞ dolları (40 qəpik) bahadır. 2023-cü ilin ilk iki ayında bu, 1,40 ABŞ dolları (2,38 manat) olub.

Əvəz Həsənov