Səudiyyə Ərəbistanında İİB-in qızıl yubileyi keçirilir

Bakı, 29 aprel, AZƏRTAC

İslam İnkişaf Bankının (İİB) yaranması və inkişafı İslam dünyasında həmrəylik və əməkdaşlığın təzahürüdür.

AZƏRTAC İƏT-in mətbuat açıqlamasına istinadla xəbər verir ki, bu sözləri İslam Əməkdaşlıq Təşkilatının Baş katibi Hissein Brahim Taha Ciddədə keçirilən İİB-in qızıl yubileyi mərasimindəki çıxışında söyləyib.

Baş katib bu münasibətlə çıxışında İİB-in 50 il ərzində İƏT-ə üzv dövlətlərin sosial-iqtisadi inkişafına dəstək istiqamətində əldə etdiyi böyük irəliləyişə görə yüksək qiymətləndirib. İİB-in keçmiş nailiyyətləri haqqında düşünən Baş katib qeyd edib ki, İİB-in yaradılması və inkişafı İƏT-ə üzv dövlətlər arasında əsl həmrəylik və əməkdaşlıq ruhunu təmsil edir.

Baş katib, həmçinin Səudiyyə Ərəbistanı Krallığının hökumətinə və xalqına yarandığı gündən İİB-ə ev sahibliyi etdiyinə, onun mandatını yerinə yetirməsinə imkan verən infrastruktur və ətraf mühitə dəstək layihələrinə görə təşəkkürünü bildirib. O, həmçinin İslam İnkişaf Bankının əməliyyatlarını asanlaşdıran daimi dəstəyə görə İƏT-ə üzv olan digər dövlətlərə də minnətdarlıq ifadə edib.

İƏT-ə üzv dövlətlərin inkişaf problemləri və onların həllində İİB-in rolu barədə danışan Baş katib bu nəhəng maliyyə qurumunun infrastrukturun inkişafı, yoxsulluğun azaldılması, elm, texnologiya, innovasiya və təhsil kimi əsas sahələrdə təşkilatın məqsədlərinin həyata keçirilməsi istiqamətində fəaliyyətini davam etdirəcəyinə əmin olduğunu bildirib.

İİB-in qızıl yubileyi tədbiri Ər-Riyadda başlayan İİB Rəhbərlər Şurasının “Keçmişi xatırlamaq, gələcəyimizi təyin etmək: orijinallıq, həmrəylik və firavanlıq” mövzusunda illik toplantısı çərçivəsində başlayıb və aprelin 30-da başa çatacaq.