Hava hücumu təhlükəsinə görə Kiyevin iki xəstəxanası təxliyə edilir

Kiyev, 26 aprel, AZƏRTAC

Kiyevin Boqatırskaya küçəsində yerləşən iki xəstəxana təcili olaraq təxliyə edilir. Onlardan biri uşaq xəstəxanasıdır.

AZƏRTAC xəbər verir ki, bu barədə Kiyev şəhər Dövlət Administrasiyası Telegram kanalında məlumat yayıb. Administrasiyanın məlumatına görə, təxliyə Rusiyanın internet mediasında faktiki olaraq həmin tibb müəssisələrinə hücum elan edildiyi ilə bağlı videonun geniş yayılması səbəbindən başlayıb. Bu xəstəxanalarda guya hərbçilərin olduğu deyilir.

“Bu, tamamilə yalandır və paytaxtın sosial infrastrukturuna hücum üçün istifadə olunan düşmən təxribatıdır. Hazırda Kiyev rəhbərliyi xəstə uşaqları, onların valideynlərini və tibb işçilərini qorumaq üçün əlindən gələni edir. Xəstələr və həkimlər paytaxtdakı digər tibb müəssisələrinə daşınır”, - deyə məlumatda qeyd olunur.

Emil Hüseynli

AZƏRTAC-ın xüsusi müxbiri

Kiyev