General-polkovnik: Türkiyə-Rusiya hərbçiləri koordinasiyalı fəaliyyətin bariz nümunəsini sərgiləyiblər

Ağdam, 26 aprel, AZƏRTAC

Ötən müddət ərzində Türkiyə və Rusiya hərbi qulluqçuları Birgə Monitorinq Mərkəzində öz vəzifələrini qarşılıqlı hörmət və həmrəylik prinsipi ilə yerinə yetiriblər. Ortaq mərkəzdə xidmət edən iki ölkə personalı bu müddət ərzində uğurlu xidmətlə yanaşı, xoş niyyət, qarşılıqlı hörmət və konstruktiv əməkdaşlıq çərçivəsində birlikdə ağır şərtlər altında koordinasiyalı fəaliyyət göstərməyin mümkünlüyünün ən bariz nümunəsini sərgiləyiblər.

AZƏRTAC xəbər verir ki, bunu Türkiyə Respublikası Silahlı Qüvvələrinin Quru Qoşunlarının Qərargah rəisi general-polkovnik Levent Ergün Türkiyə-Rusiya Birgə Monitorinq Mərkəzinin bağlanış mərasimində çıxışı zamanı deyib.

O bildirib ki, Türkiyə tərəfi bu müddət ərzində 331 görüş keçirərək koordinasiyalı fəaliyyət icra edib. Bu çərçivədə Azərbaycanın ərazi bütövlüyü tam bərpa edilənə qədər atəşkəsin müşahidəsi prosesi problemsiz həyata keçirilib. Beləliklə, iki ölkənin regional sülh və sabitliyi təmin etmək qərarlılığı beynəlxalq ictimaiyyət tərəfindən də təqdirlə izlənilib.

“Türkiyə və Rusiya ordusunun ortaq mərkəzdə birlikdə xidmət etdiyi təxminən üç il üç aylıq müddət ərzində birgə qeyd etdiyimiz bayramlarımız, icra edilən idman və mədəni tədbirlər, rusca-türkcə dil kursları iki ölkənin qarşılıqlı tolerantlıq və mədəni bağlarını da qüvvətləndirib. Bu vəsilə ilə ortaq mərkəzdə xidmət edən Rusiya sülhməramlı qüvvələrinin komandiri başda olmaqla Rusiya Federasiyasının hərbi qulluqçularına təşəkkür edirəm. Ortaq mərkəzdə icra edilən xidmət dövründə bizlərə hər məsələdə dəstəyini əsirgəməyən dost və qardaş ölkə Azərbaycan Ordusunun çox dəyərli komandirləri, hərbi qulluqçuları və ortaq mərkəzin fədakar əməkdaşlarına minnətdarlığımı bildirirəm”, - deyə Levent Ergün vurğulayıb.