Bayden bu gün Ukraynaya yardım layihəsini İMZALAYACAQ - Paketə həm də nələr daxildir?

Aprelin 24-də ABŞ Prezidenti Co Bayden Kiyevə silah tədarükünü bərpa etmək üçün Konqresin təsdiq etdiyi Ukraynaya yardım qanun layihəsini imzalayacaq.

Sfera.az xəbər verir ki, bu barədə Ağ Ev bəyanat yayıb.

"Mən bu qanun layihəsini imzalayacağam və bu həftə Ukraynaya silah və texnika göndərməyə başlayacağıq", - Bayden bildirib.

Qeyd edək ki, ABŞ Konqresinin Nümayəndələr Palatası aprelin 20-də Ukrayna, İsrail və Tayvana hərbi yardım haqqında qanun layihələri paketini qəbul edib. Sənədlər Senat tərəfindən də təsdiqlənib.

Ümumi məbləği təxminən 95 milyard dollar olan qanun layihələrinə Ukraynaya yardım üçün təxminən 61 milyard dollar və İsrailə dəstək üçün 26 milyard dollar, həmçinin münaqişə zonalarında, xüsusən də Qəzza zolağında mülki şəxslərə humanitar yardım göstərmək üçün vəsait daxildir. Sənədlər həmçinin ABŞ administrasiyasına Rusiyanın dondurulmuş aktivlərini müsadirə etməyə və Çinə qarşı əlavə sanksiyalar tətbiq etməyə imkan verir. Eyni zamanda, paket Rusiya və İran rəsmilərinə qarşı sanksiyalar tətbiq edir və İran pilotsuz təyyarələrinin istehsalı üçün istifadə edilən ABŞ texnologiyalarının ixracını daha da məhdudlaşdırır. Bundan əlavə, paketə ABŞ-də TikTok-a potensial qadağa daxildir.

Bayden qanun layihələrini imzaladıqdan sonra Vaşinqton Kiyevə 1 milyard dollarlıq hərbi yardım göndərəcək.

    
Firuzə Əliyeva