Milanda gecə yarısından sonra dondurma və pizza satışı qadağan edilə bilər

İtaliyanın Milan şəhəri gecə yarısından sonra yeməklərin, o cümlədən pizza, dondurma və içkilərin satışını qadağan edən qanun layihəsi təklif edib.

BAKU.WS xəbər verir ki, bu barədə “Sky news” məlumat yayıb.

Yerli hakimiyyət orqanları gecə saatlarında şəhərin küçələrində izdihamın qarşısını almaq üçün belə bir qadağa tətbiq etmək istəyir ki, bu da yerli sakinlərin yatmasına mane olur.

Kanal mer müavini Marko Qranellinin aprelin 22-də dediyi sözlərdən sitat gətirir:

“Məqsəd ünsiyyət və əyləncə, eləcə də sakinlərin dincliyi və əmin-amanlığı arasında balans tapmaqdır”.

Qanun layihəsi qəbul olunarsa, may ayından noyabr ayına kimi iş günləri saat 00:30-dan, istirahət və bayram günləri saat 01:30-dan açıq havada oturmaq üçün yemək və içkilərin satışı qadağan ediləcək. İtalyanların mayın əvvəlinə qədər apellyasiya şikayəti vermək və qanuna dəyişikliklər təklif etmək vaxtı var. Qeyd olunur ki, 2013-cü ildə hakimiyyət artıq belə bir qanun tətbiq etməyə çalışsa da, etirazlarla üzləşib.