AFFA-da gündəm: 12 komandalı Premyer Liqa, aşağı liqa klublarına dəstəyin artırılması

AFFA rəhbərliyi yeni mövsüm üçün plan qurur. Misli Premyer Liqasında komanda sayının 12-dək artırılması, reqlamentin dəyişməsi gündəmdədir.

Futbolinfo.az-ın əldə etdiyi məlumata görə, yekun qərar verilməyib. Amma müzakirələr məhz bunun ətrafındadır. Öncə daxili məsləhətləşmələr aparılır, məsələyə nöqtə İcraiyyə Komitəsinin mayın ortalarında (10-15-i aralığı) baş tutacaq iclaında qoyulacaq.

Say artırılandan sonra çempionatın keçirilmə qaydası da dəyişməlidir. İki dövrəlik yarışda oyun sayı həddindən artıq az olardı. 4 dövrə üçün zaman yetməz, 3 dövrə də münasib deyil. Bu səbəbdən 2 dövrəlik “altılıq” sisteminin tətbiqi planlaşdırılır. Lakin daha öncə bu praktikadan yararlanmışıq və xüsusilə ikinci “altılıq”la bağlı problemlər yaranıb. Məhz həmin komandalara stimul olması üçün variantlar haqda düşünülür, hansı pley-off qaydasından istifadə edilməsi müəyyənləşdirilir.

Reqlamentlə bağlı ən yaxşı varianta üstünlük verilməsinə çalışan AFFA rəhbərliyi hazırda klublardan gələcək təklifləri gözləyir. Ortaq məxrəc əldə edilməsə, 10 komandayla davam edilməsi, qarşıdakı illərdə 14 və ya 16 komandalı çempionatın təşkili mümkündür.

Klublara verilən dövlət yardımının məbləği də dəyişəcək. Hazırda hər klub ilə 3 milyon manat alır. Bir ara vəsaitin 5 milyonadək artırılması düşünülürdü. Sonradan bu variant unuduldu. İndi vergi xərclərinin artması üzündən həmin məbləğin 3,5 milyon olması, eyni zamanda klublara müxtəlif sponsorların cəlb edilməsi gündəmdədir.

Əvəzində AFFA rəhbərliyi aşağı liqaları gücləndirmək qərarı verib. İndiyədək I Liqa klubları illk 300 min manat dövlət yardımı aırdı. İndi bu məbləğin ikiqat artırılması, hətta 650-700 minə çatdırılması düşünülür. II Liqa təmsilçilərinə ayrılan vəsait də ikiqat olmalıdır. Bu, aşağı dəstə komandalarının böyüməsinə, Premyer Liqaya daha yaxşı vəziyyətdə gəlməsinə hesablanıb. Təsadüfi deyil, yardımın məbləği artırıldıqdan sonra infrastrukturun yaxşılaşdırılması üçün şərtlər qoyulacaq, maliyyənin müəyyən hissəsinin məhz həmin istiqamətdə xərclənməsi tələb ediləcək.

Bütün məsələlər hələlik müzakirə mərhələsindədir. Günü dəqiq təyin olunmayan İcraiyyə Komitəsinin iclasınadək fərqli təkliflər də ortaya çıxa bilər.

FƏRİD