Deputat: "Azərbaycan Fransadakı səfirini geri çağıra, o cümlədən "Total"ın ölkəmizdəki fəaliyyətini sonlandıra bilər, amma..."

"Fransa hakimiyyəti düşmənçilik hərkətləri ilə özlərinin əsl simalarını nümayiş etdiririr. Bir müddət əvvəl ölkələrimiz parlamentlərarası münasibətlərini dayandıraraq parlamentərarası işçi qrupların fəaliyyətlərini sonlandırmışdı. İndi isə Fransa Bakıdakı səfirini "məsləhətləşmələr" adı ilə geri çağırıb və bu yolla diplomatik əlaqələrimizi də qırmağa çalışır. Azərbaycan məsələyə səbirlə yanaşır. Biz də adekvat addımlar ata bilərik. Belə ki, səfirimizi geri çağıra və Fransa şirkətklərinin, o cümlədən "Total"ın ölkəmizdəki fəaliyyətini sonlandıra bilərik. Amma hesab edirəm ki, tələskənliyə yol vermək olmaz. Ölkələrarası münasibətlərin dayandırılması və şirkətlərin ölkədən çıxarılması son görəcəyimiz iş olmalıdır. Hələ ki, biz münasibətlərin bərpasına çalışmalıyıq, çünki, Makron hakimiyyəti əbədi deyil. Bir-iki ildən sonra Makron başqa biri ilə əvəz olunacaq. Onda biz ölkələrimizarası münasibətlərə yenidən baxmalı olacağıq".

Bu sözləri Pravda.az-a açıqlamasında Milli Məclisin deputatı Azər Badamov deyib.

Deputat bildirib ki, Fransa-Azərbaycan münasibətləri Makronun hakimiyyətinə qədər həmişə yüksək səviyyədə olub: "Makron hakimiyyətinin Azərbaycanofob siyasəti, ölkəmizə qarşı qərəzli yanaşması Fransa-Azərbaycan münasibətlərini tarixin minimumuna endirib. İkinci Qarabağ müharibəsində Azərbaycanın qələbə qazanaraq özünün suverən ərazilərini Ermənistanın işğalından azad etməyini Fransa hakimiyyəti heç cür həzm edə bilmir. Buna görə də son 3 ildə Fransa açıq şəkildə Azərbaycana qarşı hücuma keçib, Ermənistanı birtərəfli şəkildə dəstəkləyərək silahlandırır və ölkəmizlə əlaqələrin kəsilməsinə xidmət edən siyasətini davam etdirir. Hətta Xurşudbanu Natəvanın heykəlinə qarşı vandallılıq etməyi də unutmadılar. Bu gün ölkələrimizarası münasibətlərdə yaşanan çətinliyi müvəqqəti dövr hesab edirəm. Zaman hər şeyi yoluna qoyacaq və bu gün Fransa ilə yaşadığımız çətinlikləri də arxada qoya biləcəyinə inanıram".

Aytəkin Qardaşova