Bakı metrosunun sərnişin daşımadan gəlirləri son 23 mln. manat artıb

“Bakı Metropoliteni” QSC-nin sərnişindaşımadan gəlirləri 2023-cü ildə 37 faiz artıb.

Banker.az xəbər verir ki, bu barədə rəsmi statistik məlumatlarda qeyd edilir.

Belə ki, Azərbaycanda yeganə metro operatoru olan “Bakı Metropoliteni” sərnişin daşınmasında ötən il ərzində 83 milyon 482.7 min manatlıq gəlir əldə edib. Bu da 2022-ci ildə qeydə alınmış göstəricidən 22 milyon 732.8 min manat və ya 37.4 faiz yüksək göstəricidir.

Metropoliten 2022-c ildə 60 milyon 749.9 min manat sərnişin daşınmasından gəlir əldə etmişdi.

Bakı metrosunun sərnişin daşımalar illik müqayisədə 5.2 faiz artımla 219 milyon 452 min nəfər təşkil edib.

Gəlirlərin dinamikasının sərnişin daşımalarından daha çox artmasına səbəb qiymətlərin öncəki ildən qaldırılmasıdır. Azərbaycanda qiymət tənzimləmələrini həyata keçirən Tarif Şurası 2023-cü ilin yanvarından hər gediş üzrə tarifləri 30 qəpikdən 40 qəpiyə qaldırmışdı və bu da 33%-dən çox artım deməkdir.

Xatırladaq ki, “Bakı Metropoliteni” 2021 və 2022-c illər üzrə maliyyə göstəricilərini açıqlamayıb.